రైతుల ఆదాయం రెట్టింపునకు కృషి

టీజీ ఆయిల్‌ఫెడ్‌ ఎండీతో

అశ్వారావుపేట, న్యూస్‌టుడే: రైతుల ఆదాయం రెట్టింపయినప్పుడే వారి శ్రమకు ప్రతిఫలం దక్కినట్లని తెలంగాణ ఆయిల్‌ఫెడ్‌ ఎండీ కె.అశోక్‌రెడ్డి అన్నారు. అశ్వారావుపేట, దమ్మపేట మండలాల్లోని పామాయిల్‌ పరిశ్రమలు, నర్సరీ, తోటలను అధికారులతో కలిసి ఆయన ఇటీవల పరిశీలించారు. ఈ సందర్భంగా ‘న్యూస్‌టుడే’తో ముచ్చటించారు. ఆ వివరాలు మీ కోసం..

న్యూస్‌టుడే: ఈ ఏడాది ప్రభుత్వం నిర్దేశించిన లక్ష్యాలను ఎలా పూర్తి చేయనున్నారు?

ఎండీ: గత ఏడాది 40వేల ఎకరాల్లో కొత్తగా తోటలు పెంపకం చేపట్టగా.. ఈ ఏడాది ఉమ్మడి ఖమ్మం జిల్లాలో 20వేల ఎకరాల్లో ఆయిల్‌పాం తోటల పెంపకానికి చర్యలు చేపట్టాం. క్షేత్రస్థాయిలో ఇబ్బందులుంటే గుర్తించి తగు చర్యలు చేపడుతున్నాం.

న్యూ: కేంద్రం తెచ్చిన ఆయిల్‌పాం వయబులిటీ ప్రైస్‌పై ఎలాంటి నిర్ణయం తీసుకోనున్నారు?
ఎండీ: ఉద్యాన మిషన్‌ ద్వారా తెచ్చిన వయబులిటీప్రైస్‌తో  రైతులకు ఎంతమేర లబ్ధి చేకూరుతుందన్నదీ అధ్యయనం చేస్తున్నాం. రైతులకు ఇబ్బంది లేని విధంగా త్వరలోనే సానుకూల నిర్ణయం జరుగుతుంది. ఇది ఎన్నికల తదనంతరం ఉండనుంది.

న్యూ: సిబ్బంది లేమితో క్షేత్రస్థాయిలో రైతుల సమస్యలపై స్పందించలేకపోతున్నారనే విమర్శలపై ఏమంటారు?
ఎండీ: సిబ్బంది కొరత వాస్తవమే. ఎన్నికల షెడ్యూలుకు ముందే ఎంపిక జరిగింది. 19మంది ఉద్యాన అధికారులకు నియామక పత్రాలు ఇవ్వాల్సి ఉంది. ఈ విషయంపై ఈసీని కలిసి నియామకాలపై చర్చించనున్నాం. లేదా ఎన్నికల తరువాత నియమించే వీలుంది. ముందు ఎక్కడ అవసరం ఉందో అక్కడ సిబ్బందిని ఏర్పాటు చేయనున్నాం.

న్యూ: మన్యం ప్రాంతంలో పోడు పట్టాలు ఇటీవల ఇచ్చారు. ఆ రైతులకు మొక్కలు కావాలంటే సాంకేతిక ఇబ్బంది, బోర్లు కొరత వేధిస్తుంది. దీనిపై ఎలాంటి నిర్ణయం తీసుకోనున్నారు.
ఎండీ: ఏజెన్సీలో పోడు పట్టాలు ఉన్న రైతులకు ఇప్పటికే నీటి సౌకర్యం ఉంటే వెంటనే మొక్కలు ఇచ్చేందుకు అభ్యంతరం లేదు. నీటివసతి లేని రైతులు బోర్లు వేసుకునేందుకు వీలుగా సంబంధిత ప్రభుత్వ కార్యదర్శితో మాట్లాడి అందుకనుగుణంగా ఏర్పాటు చేయనున్నాం.

న్యూ: పామాయిల్‌ పరిశ్రమల సామర్థ్యం పెంపు, నూతన పరిశ్రమల నిర్మాణం ఎప్పుడు చేయనున్నారు?
ఎండీ: ప్రస్తుతం ఉన్న తోటలు, రాబోవు మూడేళ్ల కాలంలో వచ్చే దిగుబడి అంచనాను దృష్టిలో ఉంచుకొని నూతన పరిశ్రమల ఏర్పాటు, సామర్థ్యం విస్తరణ ఉంటుంది. దీనిపై లోతుగా అధ్యయనం చేయాలి.

న్యూ: రైతుల సమస్యల పరిష్కారానికి ఎలాంటి చర్యలు చేపట్టనున్నారు?
ఎండీ: ఉమ్మడి ఖమ్మం జిల్లా రైతులు చైతన్యవంతులు. వీరి స్ఫూర్తి రాష్ట్రానికే ఆదర్శం. కార్పొరేట్‌ ఉద్యోగాలు వదిలి మరీ వ్యవసాయంపై దృష్టి పెడుతున్న రైతులు ఈ ప్రాంతంలోనే కనిపిస్తారు. మూస పద్ధతులకు స్వస్తిచెప్పి ఆధునిక సేద్య విధానాలతో రాణిస్తున్నారు. చిన్నచిన్న సమస్యలు రైతులే పరిష్కరించుకుంటారు. వారి వల్ల సాధ్యం కాని పక్షంలో అధికార యంత్రాంగం ద్వారా పరిష్కరిస్తాం.

న్యూ: క్షేత్రస్థాయి సమస్యలను ఎలా అధిగమించనున్నారు?
ఎండీ: నేను ఎండీగా బాధ్యతలు చేపట్టి కొద్ది రోజులే అవుతోంది. క్షేత్రస్థాయిలో ఎలాంటి సమస్యలున్నాయో అధ్యయనం చేస్తున్నాను. త్వరలో ఉద్యాన, ఆయిల్‌ఫెడ్‌ క్షేత్రస్థాయి సిబ్బందితో సమావేశం నిర్వహించి వారి సమస్యలు తెలుసుకొని పరిష్కారానికి కృషిచేస్తాను. ఆ తరువాత లక్ష్యాల సాధనపై దృష్టిపెడతాను.