నయనానందకరంగా సీతారామ కల్యాణం

భద్రాచలం, న్యూస్‌టుడే: భద్రాచలం శ్రీసీతారామచంద్ర స్వామివారి ఆలయంలో మంగళవారం ప్రత్యేక పూజలు చేశారు. ఆంజనేయస్వామికి అభిషేకం చేసి అర్చన సాగింది. సింధూర తిలకాన్ని నుదట ధరించిన భక్తులు ఆలయ ప్రదక్షిణ చేసి హనుమాన్‌ చాలీసాను పఠించారు. ప్రధాన ఆలయంలో కొలువైన కోదండ రాముడికి అర్చకులు భక్తిశ్రద్ధలతో సుప్రభాతం పలికి ఆరాధించారు. కన్యాదానం, కంకణధారణ చేశారు. సీతాదేవికి యోక్త్రధారణ, రామయ్యకు యజ్ఞోపవీత ధారణ కొనసాగించారు. నిత్యకల్యాణ క్రతువులో మాంగళ్య ధారణ, తలంబ్రాల వేడుక సంతోషకరంగా సాగాయి. దర్బారు సేవ భక్తులను మంత్రముగ్ధులను చేసింది. 2న ఉదయం 8 గంటలకు రామాలయ హుండీ ఆదాయాన్ని లెక్కించనున్నట్లు ఈఓ రమాదేవి తెలిపారు.

దీక్షల విరమణకు వెసులుబాటు: శ్రీరామ నవమినాడు ప్రారంభమైన శ్రీరామ పునర్వసు దీక్షను 13న విరమించాల్సి ఉంది. 14న పట్టాభిషేకం నిర్వహించనున్నారు. ఇందులో 13న లోక్‌సభ ఎన్నికలకు సంబంధించిన పోలింగ్‌ జరగనుంది. దీన్ని దృష్టిలో ఉంచుకుని 13 నుంచి 15 వరకు భక్తులు దీక్షలను విరమించుకునే వెసులబాటు కల్పించినట్లు ఈఓ వెల్లడించారు. ఇందుకు సంబంధించి ఏర్పాట్లు చేయాలని సిబ్బందిని ఆదేశించారు.