కూలీలకు ఇబ్బందులు లేకుండా చర్యలు

కల్లూరు గ్రామీణ, న్యూస్‌టుడే: జిల్లాలో ఉపాధి కూలీలకు పనుల కల్పన, వేతనాల చెల్లింపు తదితర విషయాల్లో ఇబ్బందులు లేకుండా చర్యలు తీసుకుంటామని డ్వామా పీడీ అమర్‌నాథ్‌రెడ్డి చెప్పారు. జిల్లాలో గత కొన్ని రోజులుగా నేషనల్‌ లెవల్‌ మానిటరింగ్‌ కమిటీ ప్రతినిధులు క్షేత్రస్థాయిలో పర్యటించారు. ఉపాధి పనులు, గృహ నిర్మాణ పనులపై పరిశీలన చేశారు. ఉపాధి పనుల విషయంలో కూలీలకు న్యాయం జరుగుతోందా? లేదా? ఏవైనా అక్రమాలు జరిగాయా.. హౌసింగ్‌ లబ్ధిదారులకు బిల్లుల చెల్లింపు తదితర విషయాలపై క్షుణ్ణంగా పరిశీలించి నివేదికలు రూపొందించారు. వీటిని కేంద్ర ప్రభుత్వానికి పంపనున్నారు. క్షేత్ర స్థాయిలో పర్యటన పూర్తి చేసుకున్న కమిటీ ప్రతినిధులతో పీడీ శనివారం సమావేశమయ్యారు.