వేరే దారి లేక.. డోలీ మోత

గర్భిణిని ఆసుపత్రికి తీసుకొచ్చిన గిరిజనులు

రంగంవలస నుంచి మోసుకొస్తున్న దృశ్యం

సీతంపేట, న్యూస్‌టుడే: సరైన రోడ్లు లేకపోతే మనం అడుగు తీసి అడుగు బయట పెట్టలేం. అలాంటిది ఆ గిరిజన గ్రామంలో అసలు దారే లేదు. అలాంటి చోట ఏదైనా ప్రమాదం జరిగితే, ఆసుపత్రి దగ్గరలో లేకపోతే ఇక అంతే సంగతి. పురిటి నొప్పులు పడే గర్భిణుల పరిస్థితి అయితే ఇక వర్ణించలేం.. ఈ పరిస్థితి మరెక్కడో కాదండీ మన పక్కనే ఉన్న రంగంవలస గ్రామంలో చోటు చేసుకున్నాయి.

సీతంపేట మండలం రంగంవలస గిరిజన గ్రామానికి సరైన రోడ్లు లేక గ్రామానికి 108 అంబులెన్సు కానీ, ఇతర వాహనాలు కానీ వచ్చే పరిస్థితి లేదు. గురువారం గ్రామానికి చెందిన సవర చిన్నమ్మి అనే గిరిజన గర్భిణి పురిటినొప్పులతో బాధపడడంతో ఆమెను డోలీలో మోసుకొని మర్రిపాడు ప్రాథమిక ఆరోగ్య కేంద్రానికి (పీహెచ్‌సీ) తీసుకువచ్చారు. ఆసుపత్రిలో రెండో కాన్పులో భాగంగా ఆమె మగ బిడ్డకు జన్మనిచ్చింది. ఈ విషయమై మర్రిపాడు వైద్యాధికారి సాయిచరణ్‌ మాట్లాడుతూ తల్లీ, బిడ్డ ఆరోగ్యంగా ఉన్నారన్నారు. గ్రామానికి సరైన రహదారి లేకపోవడంతో రాళ్లు, పొదలు దాటుకొని అత్యవసర వేళ  డోలీలో మోసుకురావాల్సిన దుస్థితి ఎదురవుతుందని స్థానిక గిరిజనులు ఆవేదన చెందుతున్నారు. తాము ఎన్ని కష్టాలు పడుతున్నా అధికారుల్లో మాత్రం చలనం లేదన్నారు. ఇప్పటికైనా తమ గ్రామానికి వాహనాలు వచ్చేలా పూర్తి స్థాయి రహదారి నిర్మాణం చేపట్టాలని గిరిజనులు కోరుతున్నారు.