జీజీహెచ్‌లో రోగుల భోజనంపై విచారణ

ఒంగోలు నగరం, న్యూస్‌టుడే: సర్వజన ఆసుపత్రిలో రోగులకు నాణ్యతలేని భోజనం పెడుతున్నట్లు వచ్చిన ఫిర్యాదులపై వైద్య విద్య డైరెక్టరేట్‌ విభాగం అధికారులు స్పందించారు. ‘అడగలేనోళ్లతో చెలగాటం’ శీర్షికన బుధవారం ‘ఈనాడు’లో వచ్చిన కథనం గురించి తెలుసుకున్న డీఎంఈ విచారణ కోసం ప్రత్యేకాధికారిని పంపించారు. ఆయన మధ్యాహ్నం రోగులకు అందించిన ఆహారాన్ని ఆకస్మికంగా తనిఖీ చేశారు. మెనూలో అరటిపండు ఇవ్వాల్సి ఉండగా, రోగులకు అందనట్లు గుర్తించారు. రోగుల అభిప్రాయాలు అడిగి తెలుసుకున్నారు. అనంతరం సూపరింటెండెంట్‌ డాక్టర్‌ భగవాన్‌ నాయక్‌, ఆర్‌ఎంవో హనుమంతరావు, డైటీషియన్‌ ప్రసాదరావులతో సమావేశమయ్యారు. సూపరింటెండెంట్‌, సీఎస్‌ఆర్‌ఎంవోలు ప్రత్యేకాధికారికి వివరాలు తెలిపారు. మార్చి ఒకటి నుంచి తెనాలికి చెందిన గుత్తేదారు భోజనం అందిస్తున్నట్లు చెప్పారు. భోజనంలో నాణ్యత లేదని, సమయాలు పాటించడం లేదని గతంలో రెండు సార్లు నోటీసులిచ్చినట్లు సూపరింటెండెంట్‌ తెలిపారు. రెండు రోజుల క్రితం సిబ్బంది, రోగుల నుంచి వచ్చిన ఫిర్యాదుల మేరకు గుత్తేదారును పిలిచి డైట్‌ విషయంలో నిబంధనలు పాటించకపోతే కాంట్రాక్టు రద్దు చేసే అవకాశం ఉందని హెచ్చరించినట్లు తెలిపారు. ప్రత్యేకాధికారి డీఎంఈకు అందించే నివేదికను బట్టి తదుపరి చర్యలు ఉంటాయని భావిస్తున్నారు.