యువకుడి హత్యకేసులో ముగ్గురిఅరెస్టు

అరెస్టు చేసిన నిందితులు

గాజువాక, న్యూస్‌టుడే: నడిరోడ్డుపై యువకుడిని దారుణంగా హత్య చేసిన ముగ్గురు నిందితులను గాజువాక పోలీసులు సోమవారం రాత్రి అరెస్టు చేసి రిమాండుకు తరలించారు. ఈ ఘటనకు సంబంధించి సీఐ మల్లేశ్వరరావు తెలిపిన వివరాలు ఇవి. ఆదివారం రాత్రి గోపాలరెడ్డినగర్‌లో నడిచి వెళ్తున్న  ప్రసాద్‌(32)ను ఇదే కాలనీకి చెందిన దగ్గర బంధువులైన  శ్రీను(34), సింహాచలం(32), దుర్గాప్రసాద్‌(21) చీకట్లో మాటువేసి ఇనుపరాడ్డు, కత్తితో విచక్షణ రహితంగా దాడి చేసి గాయపర్చడంతో అక్కడికక్కడే మృతి చెందాడు. రూ.80 వేలు బాకీ తీర్చమంటే నిర్లక్ష్యంగా మాట్లాడటంతో పాటు, తమపై దౌర్జన్యానికి దిగేవాడని, అందుకే అతన్ని అంతమొందించాలని ఈ ఘాతుకానికి ఒడిగట్టినట్లు నిందితులు అంగీకరించినట్లు తెలిపారు. ఎస్‌ఐ సూర్యప్రకాశ్‌ కేసు దర్యాప్తు చేస్తున్నారు.