మూడు కార్లలో తాయిలాల సరకు దాటిపోయిందా...?!

అధికారుల సోదాల్లో వాస్తవమెంత.. 

ఎండాడ ఎంవీవీ గ్రీన్‌ గార్డెన్‌ అపార్టుమెంట్ వద్ద అధికారులు ఫ్లాట్లు తనిఖీ చేస్తుండగా సెల్లార్‌ నుంచి బయటకు వెళ్తున్న ఓ కారు

మధురవాడ, న్యూస్‌టుడే: ఎండాడ ఎంవీవీ గ్రీన్‌ గార్డెన్‌ అపార్టుమెంట్లో ఆదివారం ఎన్నికల తనిఖీ బృందం చేసిన సోదాలపై ప్రజల్లో పలు అనుమానాలు వ్యక్తమవుతున్నాయి. తూర్పు నియోజకవర్గ వైకాపా ఎమ్మెల్యే అభ్యర్థి, ఎంపీ ఎంవీవీ సత్యనారాయణ ఓటర్లకు తాయిలాలు అందించేందుకు నగదు, మద్యం, క్రికెట్ కిట్లు సంబంధిత అపార్టుమెంట్లో నిల్వ చేసినట్లు ఆదివారం ప్రధాన ఎన్నికల అధికారికి ఫిర్యాదు వెళ్లిన సంగతి తెలిసిందే. ఆ మేరకు జేసీ ఆదేశించగా.. అక్కడికి వచ్చిన అధికారులు సెల్లార్‌ నుంచి బయటకు వెళ్లిన మూడు కార్లను తనిఖీ చేయకుండా విడిచిపెట్టారని చర్చ సాగుతోంది. ఆ కార్లలోనే నిల్వ ఉంచిన సరకు బయటకు తరలించి ఉంటారని ఫిర్యాదుదారులు అనుమానం వ్యక్తం చేస్తున్నారు. అధికారుల సహకారం లేకుండా ఇదంతా జరిగి ఉంటుందా... ఫ్లాట్ల తనిఖీల ముసుగులో కార్లను విడిచి పెట్టారా అని అనుమానిస్తున్నారు. ఈ మూడు కార్లను ఎంవీవీ దగ్గరి బంధువుల ఆధ్వర్యంలో రోజూ ఇదే అపార్టుమెంట్ నుంచి ఎక్కువ సార్లు రాకపోకలు సాగిస్తున్నట్లు సమాచారం.