దిగుబడిపై అన్నదాతల దిగులు

వెంకిర్యాలలో పచ్చదనంతో కనిపిస్తున్న పొలం

జనగామ రూరల్‌, న్యూస్‌టుడే: జిల్లాలో యాసంగి సాగు రైతులకు చేదు అనుభవాన్ని మిగులుస్తోంది. సాధారణంగా వానాకాలంలో దిగుబడి తక్కువ రావడం, కోత సమయంలో అధిక వర్షాలతో నాణ్యత దెబ్బతినడం, పంట నీటి పాలు కావడం తదితర ఇబ్బందులుండేవి. యాసంగి సీజన్‌లో వరి సాగుకు అనుకూలమైన వాతావరణం తోడు కావడంతో పంట దిగుబడిపై రైతులకు ధీమా ఉండేది. ఈసారి ధాన్యం కొనుగోలుపై సందిగ్ధతతో రైతులు ఆలస్యంగా సాగు చేశారు. మరో వైపు ప్రకృతి సహకరించకపోవడంతో దిగుబడి తగ్గడానికి కారణమవుతోంది. ఏటా వానాకాలం కంటే యాసంగి సీజన్‌లో అధిక దిగుబడులు వచ్చేవి. ఈ యేడు మాత్రం రైతులకు నిరాశనే మిగులుస్తున్న వైనంపై ‘న్యూస్‌టుడే’ కథనం.

కొనుగోలుపై సందిగ్ధం..

రాష్ట్ర వ్యాప్తంగా వరి ధాన్యం కొనుగోలుపై కేంద్ర, రాష్ట్ర ప్రభుత్వాల మధ్య భేదాభిప్రాయాలు తీవ్రమయ్యాయి. ఈ నేపథ్యంలో రాష్ట్ర ప్రభుత్వం ధాన్యం కొనుగోలు చేసేది లేదని, ప్రత్యామ్నాయ, ఇతర పంటలను సాగు చేసుకోవాలని ప్రకటించింది. ప్రభుత్వ సూచన మేరకు ప్రత్యామ్నాయ పంటలకు ఈ ప్రాంత భూములు పెద్ద మొత్తంలో అనుకూలంగా లేకపోవడం, కోతుల బెడద వంటి కారణాలతో రైతులకు ఏ పంట వేసుకోవాలో తెలియని ఆందోళనకర పరిస్థితి. చివరికి చేసేది లేక రైతులు వరి సాగుపై మొగ్గు చూపారు.

సహకరించని వాతావరణం..

సాధారణంగా డిసెంబరు నుంచి జనవరి 15లోగా వరి నాట్లు వేసుకోవాలి. కానీ రైతులు జనవరి నుంచి ఫిబ్రవరి చివరి దాకా వరి నాట్లు కొనసాగాయి. నిర్ణీత సమయంలో నాట్లు పూర్తైతే ఏప్రిల్‌ 15 నాటికి కోతలు పూర్తయ్యేవి. ఇంకా క్షేత్ర స్థాయిలో సుమారు 30 శాతం పొలాలు పచ్చదనంతోనే కనిపిస్తున్నాయి. జూన్‌ మొదటి వారం వరకు వరి కోతలు జరిగే అవకాశమేర్పడింది. నాట్లు పూర్తయ్యాక ఫిబ్రవరి మొదటి, రెండు వారాల్లో మంచు కురియడం ఆగిపోయేది. కానీ ఈ యేడు మాత్రం మార్చిలోనూ మంచు కురియడంతో పంటలు తెగుళ్ల బారిన పడ్డాయి. పంట సాగు ఆలస్యం కావడం.. తెగుళ్ల నుంచి కోలుకునేందుకు సమయం, ఏప్రిల్‌లో ఎండల తీవ్రతకు పంట పుష్పించే(ఈనె) దశకు చేరడంతో ఆ పుష్పాలు ఎండ తీవ్రతతో దెబ్బతిన్నాయి. దీంతో దిగుబడిపై పెద్దగా ప్రభావం చూపింది.