వైకాపా ఆటలు సాగవు :భాజపా

ఆకివీడులో ప్రజలకు అభివాదం చేస్తున్న శ్రీనివాసవర్మ

భీమవరం పట్టణం, ఆకివీడు, న్యూస్‌టుడే: రాష్ట్రంలో అయిదేళ్లుగా అరాచక పాలన కొనసాగిందని.. కేంద్ర పథకాలను వారే అమలు చేస్తున్నట్లు వైకాపా ప్రచారం చేసుకుందని.. ఇకపై ఆ పార్టీ ఆటలు సాగవని భాజపా నరసాపురం పార్లమెంటు అభ్యర్థి భూపతిరాజు శ్రీనివాసవర్మ పేర్కొన్నారు. తెదేపా, జనసేన, భాజపా కూటమి అభ్యర్థిగా ప్రకటించిన తర్వాత నియోజకవర్గానికి వచ్చిన ఆయన భీమవరంలో బుధవారం విలేకరుల సమావేశంలో మాట్లాడారు.  అంతకు ముందు ఆకివీడు మండలం దుంపగడపలోని ఉప్పుటేరు వంతెన మీదుగా జిల్లాలోకి ప్రవేశించిన ఆయనకు కూటమి నాయకులు ఘన స్వాగతం పలికారు. ఆ ప్రాంతంలో ఉన్న రామాలయంలో పూజలు చేసిన అనంతరం  ఊరేగింపుగా భీమవరంలో పార్టీ కార్యాలయానికి చేరుకుని కమలం గుర్తును హత్తుకొని భావోద్వేగానికి గురయ్యారు. కూటమి పార్టీ నాయకులతో కలిసికట్టుగా ముందుకెళ్తానన్నారు.