ఎన్నికల బరిలో 99 మంది

పార్లమెంట్‌కు 13, అసెంబ్లీ నియోజకవర్గాలకు 86 మంది పోటీ

 ఏలూరు కలెక్టరేట్‌, న్యూస్‌టుడే: జిల్లాలో మే 13న జరగనున్న సార్వత్రిక ఎన్నికల్లో  99 మంది అభ్యర్థులు పోటీ పడనున్నారు. నామపత్రాలను ఉపసంహరించుకునే ఘట్టం సోమవారం ముగిసింది. ఆ ప్రక్రియ అనంతరం బరిలో నిలిచిన అభ్యర్థుల వివరాలను జిల్లా ఎన్నికల అధికారి, కలెక్టర్‌ ప్రసన్న వెంకటేశ్‌ కలెక్టరేట్‌లో ఏర్పాటు చేసిన పాత్రికేయుల సమావేశంలో వివరించారు. ఏలూరు పార్లమెంట్‌ నియోజకవర్గం నుంచి 17 మంది నామపత్రాలు సమర్పించగా.. వివిధ కారణాలతో 4 తిరస్కరణకు గురయ్యాయి. మూడు నామపత్రాలు డమ్మీ అభ్యర్థులవి ఉండగా.. ఒక అభ్యర్థి 25 సంవత్సరాల కంటే తక్కువ వయసు కారణంగా తిరస్కరించారు. 13 నామపత్రాలు ఆమోదం పొందాయి. ఏడు అసెంబ్లీ నియోజక వర్గాలకు సంబంధించి 86 మంది అభ్యర్థులు పోరులో నిలిచారు. మొత్తం 123 మంది నామపత్రాలు అందజేయగా..  పలు కారణాలతో 26 తిరస్కరణకు గురయ్యాయి. 11 మంది నామపత్రాలను ఉపసంహరించుకున్నారు.