వైకాపా పాలనలో దళితులకు తీవ్ర నష్టం

ఐక్యత చాటుతున్న మాజీ మంత్రి జవహర్‌, బడేటి చంటి, దాసరి ఆంజనేయులు తదితరులు

ఏలూరు అర్బన్‌, న్యూస్‌టుడే: వైకాపా పాలనలో దళితులకు తీవ్ర నష్టం వాటిల్లిందని మాజీ మంత్రి కేఎస్‌ జవహర్‌ అన్నారు. పవరుపేటలోని బడేటి విడిది కార్యాలయంలో మంగళవారం ఆయన పాత్రికేయులతో మాట్లాడుతూ దళిత సామాజిక వర్గానికి చెందిన 59 ఉప కులాల వారికి జగన్‌ అన్యాయం చేశారన్నారు. తెదేపా అమలు చేసిన 27 ఎస్సీ సంక్షేమ పథకాలను వైకాపా ప్రభుత్వం నిర్వీర్యం చేసిందని విమర్శించారు. అంబేడ్కర్‌ విదేశీ విద్యాదీవెన పథకానికి పేరు మార్చి ఆయన ప్రతిష్ఠను దిగజార్చారన్నారు. వైకాపా అయిదేళ్ల పాలనలో అనేక మంది దళితులు హత్యకు గురయ్యారని ఆరోపించారు. ఎన్డీయే ఏలూరు అసెంబ్లీ అభ్యర్థి బడేటి చంటి మాట్లాడుతూ తెదేపా ప్రభుత్వ హయాంలో దళితులు అన్ని విధాలుగా లబ్ధి పొందారని, వైకాపా పాలనలో వారికి ఏవిధమైన ప్రయోజనం చేకూరలేదన్నారు.  తెదేపా రాష్ట్ర కార్యదర్శి దాసరి ఆంజనేయులు మాట్లాడుతూ దళితులు అభ్యున్నతి సాధించాలంటే ఎన్డీయే ప్రభుత్వం అధికారంలోకి రావాల్సిన అవసరం ఉందన్నారు. సమావేశంలో మాజీ మంత్రి మరడాని రంగారావు, తెదేపా ఎస్సీ విభాగం రాష్ట్ర ఉపాధ్యక్షుడు జాలా బాలాజీ పాల్గొన్నారు.