కడప: పులివెందులలో తన నామినేషన్‌ను అడ్డుకోవాలని వైకాపా చూస్తోందని వివేకా హత్య కేసులో అప్రూవర్‌, జై భీమ్‌ భారత్‌ పార్టీ అభ్యర్థి దస్తగిరి ఆరోపించారు. తన నామపత్రాల దాఖలు కార్యక్రమాన్ని నేటి నుంచి గురువారానికి మార్చుకున్నట్లు చెప్పారు. తెదేపా అభ్యర్థి బీటెక్‌ రవి ఈరోజే నామినేషన్‌ వేస్తున్నారని.. ఆ పార్టీ ర్యాలీలోకి వైకాపా కార్యకర్తలు ప్రవేశించి దాడికి కుట్ర చేస్తున్నారని ఆరోపించారు. తనపై రాళ్ల దాడికి ప్రయత్నాలు చేసినట్లు సమాచారం అందిందన్నారు. సీఎం జగన్‌ నామినేషన్‌ వేసినప్పుడే తానూ వేయాలని నిర్ణయించుకున్నట్లు తెలిపారు. పులివెందులలో తనను జగన్‌, అవినాష్‌ ఇబ్బందులు పెడుతున్నారన్నారు. దేనికీ భయపడే ప్రసక్తే లేదని.. దీటుగా ఎదుర్కొంటానని దస్తగిరి తెలిపారు.

దస్తగిరికి భద్రత పెంపు..

నామినేషన్‌ నేపథ్యంలో దస్తగిరికి భద్రత పెంచారు. గురువారం ఆయన నామపత్రాలను ఆర్వోకు సమర్పించనున్నారు. దీంతో ఆయనకు బుధ, గురువారాల్లో భద్రత పెంచారు. 3+3, 4+4 నుంచి 4+4, 10+10కు భద్రత పెంచారు.