కుప్పం పట్టణం, న్యూస్‌టుడే: వై నాట్‌ కుప్పం అంటూ మేకపోతు గాంభీర్యం ప్రదర్శిస్తున్న వైకాపా నాయకులు.. ఆ పార్టీ అభ్యర్థి భరత్‌ నామపత్రాల దాఖలు ర్యాలీకి జనసమీకరణ కోసం పడరాని పాట్లు పడుతున్నారు. ఇప్పటికే భరత్‌ తరఫున ఆయన సతీమణి దుర్గ ఒక సెట్‌ నామినేషన్‌ వేయగా.. బుధవారం భరత్‌ భారీ ర్యాలీగా వెళ్లి మరో సెట్‌ నామినేషన్‌ వేయనున్నారు. ఇందుకోసం కుప్పం నియోజకవర్గంతో పాటు సమీపంలోని తమిళనాడు గ్రామాల నుంచి ప్రజలను తరలించేందుకు.. వెయ్యి నగదు, మద్యం, బిర్యానీ ఇస్తామంటూ ప్రలోభాలకు గురిచేస్తున్నారు. వైకాపా నేతల కుట్రలను తెదేపా శ్రేణులు బట్టబయలు చేశారు. కుప్పంలో బుధవారం జరిగే వైకాపా సమావేశానికి 50 మందిని తీసుకురమ్మన్నారని తమిళనాడులోని పర్చూరుకు చెందిన పళణి వివరించారు. వాళ్లకు ఇవ్వడానికి రూ.50 వేల నగదు కూడా అందజేశారన్నారు. కుప్పానికి 25 మందిని తీసుకొస్తే నగదు, మద్యం, బిర్యానీ ఇస్తామన్నారని తమిళనాడులోని నాట్రాంపల్లెకు చెందిన రవికుమార్‌ వెల్లడించారు. ఈ మేరకు అక్కడి వారు మాట్లాడుతున్న వీడియోలు సామాజిక మాధ్యమాల్లో వైరలయ్యాయి.