విజయవాడ: తూర్పుగోదావరి జిల్లా అనపర్తి నియోజకవర్గానికి చెందిన నల్లమిల్లి రామకృష్ణారెడ్డి భాజపాలో చేరారు. భాజపా రాష్ట్ర అధ్యక్షురాలు పురందేశ్వరి, సిద్దార్థనాథ్‌సింగ్‌, అరుణ్‌సింగ్‌ సమక్షంలో ఆయన కాషాయ కండువా కప్పుకొన్నారు. అనపర్తి నుంచి ఆ పార్టీ అభ్యర్థిగా రామకృష్ణారెడ్డి పోటీ చేయనున్నారు.

తెదేపా, జనసేన, భాజపా పొత్తులో భాగంగా అనపర్తి సీటు భాజపాకు కేటాయించారు. తనకు టికెట్‌ కేటాయించాలని రామకృష్ణారెడ్డి పట్టుబట్టడంతో గత కొన్ని రోజులుగా ఈ స్థానంపై ఉత్కంఠ నెలకొంది. అనపర్తి స్థానం బదులుగా అన్నమయ్య జిల్లాలోని తంబళ్లపల్లి లేదా ఏలూరు జిల్లాలోని దెందులూరు సీటును భాజపా తీసుకునే అవకాశముందని ప్రచారం జరిగింది. కానీ, సమీకరణలు కుదరక పోవడంతో నల్లమిల్లి రామకృష్ణారెడ్డి భాజపా నుంచి పోటీ చేయాలని నిర్ణయించారు.