పిఠాపురం: జనసేన అధినేత పవన్‌ కల్యాణ్‌కు ప్రజలే కుటుంబ సభ్యులని సినీనటుడు వరుణ్‌ తేజ్‌ అన్నారు. పవన్‌ పోటీ చేస్తోన్న పిఠాపురం నియోజకవర్గంలో ఆయనకు మద్దతుగా వరుణ్‌ ఎన్నికల ప్రచారం నిర్వహించారు. గత ఎన్నికల్లో విజయం సాధించకపోయినా.. ప్రజలకు ఆయన మేలు చేస్తున్నారని అన్నారు. అప్పులు చేసి మరీ కౌలు రైతులకు సాయం చేస్తున్నారని చెప్పారు. ఈ సారి ఎన్నికల్లో గెలిపిస్తే ప్రజలకు మరింత సేవ చేస్తారన్నారు. ఎన్డీయే కూటమి అభ్యర్థులను గెలిపించాలని కోరారు.

పిఠాపురంలో ఘనస్వాగతం..

పిఠాపురం విచ్చేసిన వరుణ్‌ తేజ్‌కు తెదేపా, భాజపా, జనసేన నేతలు ఘనస్వాగతం పలికారు. నాగబాబు, వరుణ్‌..  పాదగయ క్షేత్రంలో కుక్కుటేశ్వర స్వామి, దత్తాత్రేయుడు, పురుహూతికా అమ్మవార్లను దర్శించుకుని ప్రత్యేక పూజలు నిర్వహించారు. అనంతరం గొల్లప్రోలు మండలం తాటిపర్తి, కొడవలి, చెందుర్తి గ్రామాలలో బైకు ర్యాలీ, రోడ్డు షో లో పాల్గొన్నారు. దుర్గాడలో నిర్వహించిన బహిరంగ సభలో ప్రసంగించారు.