అమరావతి: ఆదివారం రాష్ట్రంలోని అన్ని జిల్లాల్లో స్టేట్‌బ్యాంక్‌ ఆఫ్‌ ఇండియా బ్రాంచిలు పనిచేసేలా చూడాలని ఆర్థికశాఖ అధికారులు డీజీఎంకు లేఖ రాయడం చర్చనీయాంశమవుతోంది. మద్యం డబ్బులు డిపాజిట్‌ చేయడానికి అన్న కారణంతో ఆ బ్రాంచిలు తెరిచి ఉంచాలని లేఖ రాశారు. రాష్ట్రంలో రెండో శనివారం బ్యాంకులకు సెలవు. తిరిగి సోమవారం ఎన్నికలు ఉన్నందున ఆ రోజు కూడా సెలవు దినమే. ఈ నేపథ్యంలో శుక్రవారం, శనివారాల నాటి మద్యం అమ్మకాల డబ్బులను బ్యాంకుల్లో జమచేసేందుకు వీలుగా ఈ బ్రాంచిలన్నీ తెరిచి ఉంచాలని ఆర్థికశాఖ అధికారులు కోరారు. ఆ రోజు రూ.200 కోట్ల వరకు జమచేయాల్సి ఉంటుందని అందులో పేర్కొన్నారు. గతంలో సెలవులప్పుడు ఇలాంటి ఏర్పాట్లు చేసిన దాఖలాల్లేవు. ఇప్పుడు ఈ చర్యలు తీసుకోవడం అనేక అనుమానాలకు తావిస్తోంది.