పెనమలూరు: కృష్ణా జిల్లా పెనమలూరు నియోజకవర్గం పరిధిలోని గంగూరులో వైకాపా అభ్యర్థి జోగి రమేశ్‌ అనుచరులు అరాచకం సృష్టించారు. గ్రామంలోని ఓ కాలనీలో చెట్లు, స్తంభాలకు కట్టిన తెలుగుదేశం జెండాలను పీకి గందరగోళం చేశారు. రెండ్రోజుల క్రితం తెదేపా అభ్యర్థి బోడె ప్రసాద్‌ ఎన్నికల ప్రచారంలో భాగంగా కాలనీ వాసులు వాటిని ఏర్పాటు చేశారు. గురువారం జోగి రమేశ్‌ తన ప్రచారంలో భాగంగా గ్రామానికి రాగా.. తెదేపా జెండాలను తీసేసి వాహనాల కింద, కాళ్ల కింద వేసి తొక్కుతూ వీరంగం వేశారు. ఇదేమిటని ప్రశ్నించేందుకు వెళ్లిన తెదేపా అభిమానులపై దాడులకు దిగారు. అదే సమయంలో అక్కడున్న పోలీసులు అదుపు చేయడంతో వెనక్కి తగ్గి వెళ్లిపోయారు.