Roja: పాదయాత్రలు చేస్తే బరువు తగ్గడం తప్ప ప్రయోజనం లేదు: రోజా

విజయవాడ: పర్యాటక రంగంలో ఏపీని వేగంగా అభివృద్ధి చేస్తున్నామని రాష్ట్ర పర్యాటక శాఖ మంత్రి ఆర్కే రోజా తెలిపారు. భవానీ ద్వీపంలో మూడు రోజుల పాటు నిర్వహించిన సంక్రాంతి సంబరాల ముగింపు కార్యక్రమంలో ఆమె ముఖ్య అతిథిగా పాల్గొన్నారు. కళాకారులతో కలిసి కోలాటం ఆడారు. సంక్రాంతి సందర్భంగా ఏర్పాటు చేసిన ‘మన గ్రామం’ స్టాల్స్‌ను ఆమె పరిశీలించారు. ఆనంతరం మట్టి కుండలు తయారు చేశారు.

ఈ సందర్భంగా రోజా మాట్లాడుతూ.. పర్యాటకశాఖ ఆధ్వర్యంలో సంక్రాంతి సంబరాలను అత్యంత ఘనంగా నిర్వహించడం ఆనందంగా ఉందని అన్నారు. భవానీ ద్వీపానికి వస్తే  సొంత గ్రామానికి వచ్చినట్లుందన్నారు. 2023 నూతన సంవత్సర వేడుకలను కూడా మొదటిసారి భవానీ ద్వీపంలో చేశామన్నారు. విజయవాడ, విశాఖపట్నం, తిరుపతి ప్రాంతాల్లో పర్యాటక అభివృద్ధికి ప్రభుత్వం జీవో కూడా ఇచ్చినట్లు మంత్రి రోజా గుర్తు చేశారు. పవన్ కళ్యాణ్‌ వారాహితో వచ్చినా, నారా లోకేష్ యువగళంతో వచ్చినా ప్రజలు నమ్మే పరిస్థితి లేదని, పాదయాత్రలు చేస్తే బరువు తగ్గడం తప్ప ప్రయోజనం ఉండదని ఆమె పేర్కొన్నారు.