ఆదిత్యుడిపై అధ్యయనానికి ముందడుగు

నేడు వీఈఎల్‌సీ అందించనున్న ఐఐఏ

ఈనాడు, బెంగళూరు: సూర్యుడిపై అధ్యయనం కోసం ఇస్రో ప్రతిష్ఠాత్మకంగా రూపొందిస్తున్న ఆదిత్య ఎల్‌-1 ఉపగ్రహంలో ఉపయోగించే ఏడు పేలోడ్‌ల్లో ఒకటైన ‘విజిబుల్‌ ఎమిషన్‌ లైన్‌ కొరోనాగ్రాఫ్‌ (వీఈఎల్‌సీ)’ను ఇండియన్‌ ఇన్‌స్టిట్యూట్‌ ఆఫ్‌ ఆస్ట్రోఫిజిక్స్‌ (ఐఐఏ) అందించనుంది. బెంగళూరు పరిసరాల్లోని సెంటర్‌ ఫర్‌ రీసెర్చ్‌ అండ్‌ ఎడ్యుకేషన్‌ ఇన్‌ సైన్స్‌ అండ్‌ టెక్నాలజీ(క్రెస్ట్‌)లో గురువారం ఈ భారీ పేలోడ్‌ను ఇస్రో చైర్మన్‌ ఎస్‌.సోమనాథ్‌కు అందిస్తామని ఐఐఏ ప్రకటించింది. వచ్చే ఆగస్టు లేదా సెప్టెంబరులో ఆదిత్య ఎల్‌-1ను ప్రయోగించేందుకు ఇస్రో సిద్ధమవుతున్న విషయం తెలిసిందే. 400 కిలోల బరువున్న ఆదిత్య ఎల్‌-1 భూస్థిర కక్ష్యకు దిగువన 800 కిలోమీటర్లు, భూమి నుంచి సూర్యుని దిశగా 1.5 మిలియన్ల కిలోమీటర్ల దూరంలో ఉండేలా ప్రయోగిస్తారు. సూర్యగోళం నుంచి ప్రసరించే అత్యంత శక్తిమంతమైన కాంతి ప్రభావాన్ని అధ్యయనం చేసేందుకు అనువుగా ఈ పేలోడ్‌లను రూపొందించారు. ఆన్‌బోర్డ్‌ మిషన్‌లో వీఈఎల్‌సీతో పాటు సోలార్‌ అల్ట్రావైలెట్‌ ఇమేజింగ్‌ టెలిస్కోప్‌, ఆదిత్య సోలార్‌ విండ్‌ పార్టికల్‌ ఎక్స్‌పెరిమెంట్‌, ప్లాస్మా అనలైజర్‌ ప్యాకేజ్‌ ఫర్‌ ఆదిత్య, సోలార్‌ లో ఎనర్జీ ఎక్స్‌రే స్పెక్ట్రోమీటర్‌, హైఎనర్జీ ఎల్‌-1 ఆర్బిటింగ్‌ ఎక్స్‌రే స్పెక్ట్రోమీటర్‌, మ్యాగ్నెటోమీటర్‌ పేలోడ్‌లు కూడా అమరుస్తారు.