అదానీ ఇంటికి శరద్‌ పవార్‌

దిల్లీ: విపక్ష కూటమిలో నేషనలిస్టు కాంగ్రెస్‌ పార్టీ (ఎన్సీపీ) అధినేత శరద్‌ పవార్‌ కలకలం రేపారు. శనివారం ఆయన అహ్మదాబాద్‌ వెళ్లి పారిశ్రామికవేత్త గౌతమ్‌ అదానీని కలిశారు. అదానీ సంస్థకు చెందిన ఓ ఫ్యాక్టరీని ప్రారంభించారు. అనంతరం అదానీ నివాసం, కార్యాలయాన్ని సందర్శించారు. ఇందుకు సంబంధించిన ఫొటోలను తన ట్విటర్‌ హ్యాండిల్‌లో పంచుకున్నారు. ఈ కొత్త కర్మాగారాన్ని ప్రారంభించడం గౌరవంగా భావిస్తున్నానని పేర్కొన్నారు. అదానీ, పవార్‌లు కలుసుకోవడం కొత్త కాదు. అమెరికాకు చెందిన షార్ట్‌ సెల్లర్‌ సంస్థ హిండెన్‌బర్గ్‌ నివేదిక వెలుగులోకి వచ్చిన తర్వాత విపక్షాలన్నీ అదానీ గ్రూప్‌ సంస్థలపై సంయుక్త పార్లమెంటరీ కమిటీ వేయాలని డిమాండ్‌ చేస్తున్న తరుణంలోనూ పవార్‌ నివాసానికి అదానీ వెళ్లి కలిశారు. ఆ తర్వాత కొన్ని రోజులకే హిండెన్‌బర్గ్‌ నివేదిక ఆధారంగా అదానీపై చెలరేగుతున్న విమర్శలను పవార్‌ తప్పుపట్టారు. అతనికి మద్దతుగా నిలిచారు. ఈ ఏడాది జూన్‌లో కూడా పవార్‌ను అదానీ కలిశారు.