‘భవిష్యత్తును ఊహించగలను’

జాతీయ పురస్కారాల ప్రదానంలో ప్రధానమంత్రి నరేంద్ర మోదీ

దిల్లీ: ‘‘నా విజయ రహస్యం ఏమిటని చాలామంది అడుగుతుంటారు. వారందరికీ నేను సమాధానం చెప్పను. ఎక్కడైనా రెస్టారెంట్‌ యజమాని తన వంటశాలను చూపిస్తాడా? నాపై ఈశ్వరుడి కృప ఉంది. భవిష్యత్తులో జరగబోయేదానిని నేను ముందే ఊహించగలను’’ అని ప్రధానమంత్రి నరేంద్రమోదీ చెప్పారు. కేంద్ర ప్రభుత్వం కొత్తగా ప్రవేశపెట్టిన ‘నేషనల్‌ క్రియేటర్స్‌’ (జాతీయ సృష్టికర్తల) పురస్కారాలను విజేతలకు శుక్రవారం దిల్లీలోని భారత మండపంలో ఆయన అందజేశారు. ఈ సందర్భంగా మాట్లాడుతూ త్వరలో జరగబోయే సార్వత్రిక ఎన్నికల్లో గెలిచేది తామేనని, వచ్చే ఏడాది శివరాత్రికి కూడా ఈ అవార్డులను తానే అందిస్తానని ధీమా వ్యక్తంచేశారు. ‘కంటెంట్‌ క్రియేటర్లు’ మన దేశానికి డిజిటల్‌ రంగంలో రాయబారులని చెప్పారు. ‘‘దేశ సంస్కృతి, సంప్రదాయాలు, వారసత్వంపై ప్రపంచానికి సృజనాత్మకంగా చాటిచెప్పడానికి ‘క్రియేట్‌ ఆన్‌ ఇండియా’ ఉద్యమాన్ని ప్రారంభించాలి. మీరు రూపొందించే అంశాలతో మీకే కాకుండా దేశానికీ భారీగా లైక్‌లు రావాలి. ఐరాస భాషలైన జర్మన్‌, ఫ్రెంచ్‌, స్పానిష్‌ తదితరాల్లోనూ మీరు సమర్పణలు చేయగలగాలి’’ అని మోదీ పేర్కొన్నారు.