Maruti Suzuki: ఎయిర్‌ బ్యాగ్‌ పని చేయలేదు.. కారు ధర రిఫండ్‌ చేయండి!

మలప్పురం: మూడేళ్ల క్రితం జరిగిన ఓ ప్రమాదంలో కారులో ఎయిర్‌ బ్యాగ్‌ పనిచేయకపోవడంపై కేరళలోని వినియోగదారుల ప్యానెల్‌ కీలక ఆదేశాలు జారీ చేసింది. ప్రముఖ ఆటోమొబైల్‌ దిగ్గజం మారుతీ సుజుకీ ఇండియా లిమిటెడ్‌ సదరు వినియోగదారుడికి ఆ కారు ధరను రిఫండ్‌ చేయాలని సూచించింది. ఇండియానూర్‌కు చెందిన మహమ్మద్‌ ముస్లియార్‌ అనే వ్యక్తి దాఖలు చేసిన పిటిషన్‌పై మలప్పురం జిల్లా వినియోగదారుల కమిషన్‌ పైవిధంగా ఆదేశాలిచ్చింది.  వివరాల్లోకి వెళ్తే.. 2021 జూన్‌ 30న ఫిర్యాదుదారుడు తన కారులో ప్రయాణిస్తుండగా ప్రమాదం చోటుచేసుకుంది. ఈ ఘటనలో అతడికి తీవ్ర గాయాలవడంతో పాటు వాహనం కూడా ధ్వంసమైంది.  

కర్ణాటక సీఎం సిద్ధరామయ్యకు ₹10వేలు జరిమానా

 వాహనంలో ఎయిర్‌బ్యాగ్ అమర్చడంలో తయారీదారు తప్పిదం వల్లే తనకు తీవ్ర గాయాలయ్యాయని పేర్కొంటూ అతడు వినియోగదారుల కమిషన్‌ను ఆశ్రయించాడు. ప్రమాద సమయంలో ఎయిర్‌ బ్యాగ్‌ పనిచేయలేదని మోటార్‌ వెహికల్‌ ఇన్‌స్పెక్టర్‌ నివేదిక ఇవ్వడంతో  ఫిర్యాదుదారుడికి రూ.4,33,854తో పాటు పిటిషన్‌ ఖర్చుల కింద మరో రూ.20,000 చెల్లించాలని మారుతీ సుజుకీని వినియోగదారుల కమిషన్‌ ఆదేశించింది. నెల రోజుల వ్యవధిలో తమ ఆదేశాలను అమలుచేయాలని.. లేదంటే 9 శాతం వడ్డీతో ఈ మొత్తాన్ని చెల్లించాల్సి ఉంటుందని హెచ్చరించింది.