Bengaluru: చెత్తకుప్పలో లభ్యమైన ఆ రూ.25 కోట్లు నకిలీవేనట!

బెంగళూరు: కర్ణాటక రాజధాని బెంగళూరు (Bengaluru) శివారులో చెత్త ఏరుకునే వ్యక్తికి అక్కడి ఓ చెత్తకుప్పలో రూ.25 కోట్ల విలువైన అమెరికన్‌ డాలర్లు లభ్యమైన విషయం తెలిసిందే. అయితే, వాటిని క్షుణ్నంగా పరిశీలించగా ఆ నోట్లు (US Dollars) నకిలీవి (Fake Notes)గా తేలాయట. పోలీసులు ఈ విషయాన్ని వెల్లడించారు. వాటిని రిజర్వ్ బ్యాంక్‌ ఆఫ్‌ ఇండియా (RBI)కు పంపగా.. ఆ నోట్లు ఫొటోకాపీ, లేదా ప్రింట్‌ తీసినవిగా అధికారులు తెలిపారన్నారు.

సల్మాన్‌ షేక్‌ అనే వ్యక్తి ఇటీవల బెంగళూరు శివారులో చెత్త ఏరుకుంటుండగా అమెరికన్‌ డాలర్ల కట్టలు 23 కనిపించాయి. అతడి యజమాని, అక్కడి నుంచి ఓ సామాజిక కార్యకర్త ద్వారా ఈ వ్యవహారం బెంగళూరు పోలీసుల వద్దకు చేరింది. ఈ మొత్తం విలువ రూ.25 కోట్లు ఉంటుందని పోలీసులు అంచనా వేశారు. ఈ నోట్లపై కొన్ని రకాల రసాయనాలను పూసినట్లు గుర్తించారు. బ్లాక్‌ డాలర్‌ స్కామ్‌కు పాల్పడుతున్న ముఠాకి చెందిన వారు ఈ కరెన్సీ నోట్లను అక్కడ వదిలేసి వెళ్లిపోయి ఉంటారని అనుమానించారు.

చెత్తకుప్పలో రూ.25 కోట్లు..!

డబ్బుతోపాటు ఐరాస ముద్రతో కూడిన ఓ లేఖ కూడా షేక్‌కు లభించింది. ‘దక్షిణ సూడాన్‌లోని ఐరాస శాంతి పరిరక్షక దళాలకు సాయం కోసం ఐరాస భద్రతామండలి ఆమోదంతో ఎకనామిక్‌, ఫైనాన్సియల్‌ కమిటీ ప్రకటించిన ప్రత్యేక నిధి’ అని రాసి ఉంది. ఈ క్రమంలోనే అవి నిజమైన డాలర్లేనా? నకిలీవా? అని గుర్తించేందుకు వాటిని ఆర్బీఐకు పంపగా.. చివరకు నకిలీవిగా తేలాయి. మరిన్ని వివరాల కోసం వాటిని చెన్నైలోని ఓ ప్రైవేటు బ్యాంకుకు తరలించినట్లు పోలీసులు తెలిపారు.  ఈ మేరకు కేసు నమోదు చేసి దర్యాప్తు చేస్తున్నట్లు చెప్పారు.