Rahul Gandhi: కులగణనకు మోదీ అంగీకరించరు: రాహుల్ కీలక వ్యాఖ్యలు

భువనేశ్వర్‌: ప్రధాని నరేంద్ర మోదీ(Modi)ని ఉద్దేశించి కాంగ్రెస్ అగ్రనేత రాహుల్ గాంధీ(Rahul Gandhi) కీలక వ్యాఖ్యలు చేశారు.  కులం గురించి ఆయన అబద్ధం చెప్పారని ఆరోపించారు. ప్రస్తుతం రాహుల్‌ భారత్‌ జోడో న్యాయ యాత్ర (Bharat Jodo Nyay Yatra)లో భాగంగా ఒడిశాలో పర్యటిస్తున్నారు.

‘మోదీ ఓబీసీ వర్గానికి చెందిన వ్యక్తి కాదు. ఆయన గుజరాత్‌లోని తెలి కులంలో జన్మించారు. దీనిని 2000 సంవత్సరంలో జనరల్ విభాగం నుంచి ఓబీసీ కేటగిరీలోకి మార్చారు. ఆయన ఓబీసీకి చెందిన కుటుంబంలో జన్మించలేదు. అందుకనే.. తన జీవితాంతం కులగణనకు అంగీకరించరు’ అని రాహుల్(Rahul Gandhi) ఆరోపించారు. రాహుల్‌ తొలుత మోదీ కులాన్ని ‘తెలి’గా పేర్కొన్నారు. ఆ తర్వాత ‘ఘాంచీ’ కులాన్ని ఉద్దేశించే తాను అలా అన్నానని తెలిపారు. ‘ఘాంచీ’నే కొన్ని ప్రాంతాల్లో ‘తెలి-ఘాంచీ’, ‘మోద్‌-ఘాంచీ’గా పేర్కొంటారు.

మన్మోహన్‌జీ చక్రాల కుర్చీలోనూ పనిచేశారు.. మాజీ ప్రధానిపై మోదీ ప్రశంసలు

ఇదిలా ఉంటే.. గురువారం ఒడిశా నుంచి ఈ యాత్ర ఛత్తీస్‌గఢ్‌లోకి ప్రవేశించనుంది. కొద్దినెలల క్రితం అక్కడ జరిగిన అసెంబ్లీ ఎన్నికల్లో కాంగ్రెస్ పరాభవాన్ని మూటకట్టుకుంది. ఈ నేపథ్యంలో రాహుల్ గాంధీ(Rahul Gandhi) తొలిసారి అక్కడకు వెళ్లనున్నారు. మణిపుర్‌ నుంచి మహారాష్ట్ర వరకు ‘భారత్‌ జోడో న్యాయయాత్ర’.. 15 రాష్ట్రాలు 100 లోక్‌సభ నియోజకవర్గాల పరిధిలో 67 రోజుల పాటు కొనసాగనుంది. జనవరి 14న మణిపుర్‌లోని ధౌబల్‌ పట్టణంలో మొదలైన ఈ కార్యక్రమం.. దాదాపు 6713 కి.మీ మేర సాగనుంది.