Japanese Tourist: హోలీ వేడుకల్లో అసభ్య ప్రవర్తన.. భారత్‌ విడిచి వెళ్లిన జపాన్‌ యువతి

దిల్లీ: ఇటీవల జరిగిన హోలీ వేడుక(Holi Celebrations)ల్లో జపాన్‌( Japan)కు చెందిన యువతితో కొందరు యువకులు అసభ్యంగా ప్రవర్తించిన వీడియోలు వైరల్‌గా మారాయి. దిల్లీలో జరిగిన ఈ ఘటనలో కొందరు వ్యక్తులు ఆమెకు బలవంతంగా రంగులు పూయడం కనిపిస్తోంది. దీనికి సంబంధించి పోలీసులు ముగ్గురిని అరెస్టు చేశారు. అలాగే ఆ టూరిస్టు భారత్‌ వీడి, బంగ్లాదేశ్‌ వెళ్లిపోయింది.

భారత్‌ పర్యటనకు వచ్చిన జపాన్‌ యువతి దిల్లీలోని పహార్‌ గంజ్‌ ప్రాంతంలో ఉంది. దేశమంతా హోలీ ఉత్సవాలు చేసుకుంటున్న తరుణంలో కొందరు యువకులు ఈ జపాన్‌ టూరిస్టు(Japanese Tourist)ను గట్టిగా పట్టుకొని, ఆమెను చుట్టుముట్టి రంగులు పూశారు. తలపై కోడిగుడ్లు కొట్టారు. వారిని విడిపించుకొని దూరంగా వెళ్తున్న ఆమెను మరో యువకుడు పట్టుకోబోగా.. అతడి చెంప పగులగొట్టింది. వారు ఆమెతో ప్రవర్తించిన దృశ్యాలు నెట్టింట్లో వైరల్‌గా మారాయి. ఆ ఘటనపై తీవ్ర నిరసన వ్యక్తమైంది. అయితే వారిపై సదరు యువతి ఎలాంటి కేసూ నమోదు చేయలేదు. దీని తర్వాత బంగ్లాదేశ్‌ వెళ్లిపోయిన ఆమె.. ట్విటర్‌గా వేదికగా స్పందించింది. ‘నేను క్షేమంగానే ఉన్నాను. ఈ విషయం ఇంత సీరియస్ అవుతుందని అనుకోలేదు’ అని ఆ యువతి ట్వీట్ చేసింది. 

కాగా ఈ వీడియోలపై దిల్లీ మహిళా కమిషనర్‌ స్వాతీమాలీవాల్‌(Swati Maliwal) స్పందించారు. ఈ ఘటన వీడియోలు పరిశీలించి, దానికి పాల్పడినవారిని అరెస్టు చేయాలని పోలీసులను కోరారు. ఆ వ్యక్తుల ప్రవర్తన  సరిగాలేదని ఆగ్రహం వ్యక్తం చేశారు.