Anand Devarakonda: ‘హైవే’లో ఏం జరిగింది?

ఆనంద్‌ దేవరకొండ కథానాయకుడిగా కేవీ గుహన్‌ తెరకెక్కిస్తున్న చిత్రం ‘హైవే’. వెంకట్‌ తలారి నిర్మిస్తున్నారు. మానస రాధాకృష్ణన్‌ కథానాయిక. సయామీ ఖేర్‌, అభిషేక్‌ బెనర్జీ, సత్య కీలక పాత్రలు పోషిస్తున్నారు. మంగళవారం ఆనంద్‌ దేవరకొండ పుట్టినరోజు సందర్భంగా ఈ సినిమా నుంచి ఆయన కొత్త లుక్‌ విడుదల చేశారు. ఆ పోస్టర్‌లో ఆనంద్‌ ఓ కొండరాయిపై కూర్చొని చుట్టూ ఉన్న ప్రకృతిని ఆస్వాదిస్తూ కనిపించారు. ‘‘విభిన్నమైన సైకో క్రైమ్‌ థ్రిల్లర్‌ కథాంశంతో రూపొందుతోన్న చిత్రమిది. ఆనంద్‌ కెరీర్‌లో మరో కొత్త తరహా సినిమా అవుతుంది. త్వరలో విడుదల తేదీ ప్రకటిస్తాం’’ అని దర్శక నిర్మాతలు తెలియజేశారు. ఈ సినిమాకి సైమన్‌ కె.కింగ్‌ స్వరాలందిస్తున్నారు. ‘బేబీ’, ‘గం.. గం.. గణేశా’ చిత్ర బృందాలు సైతం కొత్త ప్రచార చిత్రాలు విడుదల చేసి.. ఆనంద్‌కు పుట్టినరోజు శుభాకాంక్షలు తెలియజేశాయి. ఆయన హీరోగా నటిస్తున్న ఈ రెండు సినిమాలు ప్రస్తుతం చిత్రీకరణ దశలో ఉన్నాయి.