Pawankalyan: ‘జాని’ నాకెంత నచ్చిందో చెప్పాలనుకున్నా.. కానీ: ప్రియదర్శి

హైదరాబాద్‌: కమెడియన్‌, సహాయనటుడిగానే కాకుండా.. హీరోగానూ మంచి సక్సెస్‌ సొంతం చేసుకున్నారు నటుడు ప్రియదర్శి. ప్రస్తుతం వరుస సినిమాలు చేస్తోన్న ఆయన తాజాగా తన అభిమాన నటుడు పవర్‌స్టార్‌ పవన్‌కల్యాణ్‌ని కలిశారు. ఆయన ఆటోగ్రాఫ్‌ తీసుకున్నారు. దీనికి సంబంధించిన ఫొటోలను ప్రియదర్శి ట్విటర్‌ వేదికగా షేర్‌ చేస్తూ పవనంటే తనకెంత ఇష్టమో రాసుకొచ్చారు. ‘‘ఎప్పటి మాదిరిగానే సారధి స్టూడియోలో షూటింగ్‌కి వెళ్లాను. కానీ, ఆరోజు మాత్రం ఎప్పటిలాగా లేదు. ఎటుచూసినా హడావుడి, అందరి కళ్లలో ఆనందం, అందరి నోట ఒకే మాట.. పవన్‌కల్యాణ్‌ వస్తున్నారని. అంతే, పవన్‌ని ఒక్కసారి కలిసి మాట్లాడి, ఆయన తీసిన ‘జాని’ నాకెంత ఇష్టమో చెప్పడానికి రోజంతా ఎదురుచూశా. కానీ కుదరలేదు. ఇప్పుడు హరీశ్‌ శంకర్‌ అన్న వల్ల నా కోరిక తీరింది. పవన్‌ని కలిసి మాట్లాడడం ఒక మర్చిపోలేని అనుభూతి’’ అని ప్రియదర్శి చెప్పారు. వెంటనే హరీశ్‌ శంకర్‌ దీనిపై స్పందించారు. ‘‘కెరీర్‌లో ఎన్నో విజయాలు అందుకున్నప్పటికీ నువ్వు ఇలానే సాధారణంగా ఉండటం నీ విధేయతను తెలియజేస్తోంది. పవన్‌ అంటే మనందరికీ ఉన్న అభిమానం వల్ల ఇప్పుడు నువ్వు ఎంతలా భావోద్వేగానికి గురవుతున్నావో నాకు అర్థమవుతోంది’’ అని హరీశ్‌ రిప్లై ఇచ్చారు.