Bawaal: నేరుగా ఓటీటీలోకి వచ్చేస్తున్న జాన్వీ-వరుణ్‌ల కొత్త మూవీ

ఇంటర్నెట్‌డెస్క్‌: సాధారణంగా కొత్త సినిమాలు థియేటర్‌లో సందడి చేసిన తర్వాత ఓటీటీలో విడుదలవుతుంటాయి. ఇటీవల కొందరు దర్శక-నిర్మాతలు కేవలం ఓటీటీల కోసమే కొన్ని చిత్రాలను రూపొందిస్తున్నారు. ఈ క్రమంలో ఓ ఆసక్తికర చిత్రం నేరుగా ఓటీటీలో స్ట్రీమింగ్‌ అయ్యేందుకు సిద్ధమైంది. నితేశ్‌ తివారీ దర్శకత్వంలో వరుణ్‌ ధావన్‌(Varun Dhawan), జాన్వీకపూర్‌ (Janhvi Kapoor) జంటగా నటించిన మూవీ ‘బవాల్‌’ (Bawaal). షాజిద్‌ నదియాద్‌వాల్‌ నిర్మాత. థియేటర్‌లో విడుదల కావాల్సిన ఈ సినిమా ప్రముఖ ఓటీటీ వేదికగా అమెజాన్‌ ప్రైమ్‌ వీడియో వేదికగా స్ట్రీమింగ్‌ (Bawaal On Prime) కానుంది. జులై నెలలో ఈ చిత్రాన్ని విడుదల చేయనున్నట్లు అమెజాన్‌ ప్రైమ్‌ వీడియో తెలిపింది. అయితే, తేదీ మాత్రం ఇంకా ఖరారు చేయలేదు. 200 దేశాల్లో ఈ చిత్రం స్ట్రీమింగ్‌ కానుంది. ‘ప్రతి ప్రేమ కథ ఒక యుద్ధమే’ అని క్యాప్షన్‌లో పేర్కొన్నారు. ప్రేమ, యుద్ధం నేపథ్యంలో ‘బవాల్‌’ కథ సాగనున్నట్లు ప్రచార చిత్రం చూస్తే అర్థమవుతోంది. చిత్రం ఈఫిల్‌ టవర్‌ను కూడా చూపించారు.