Ghani: ‘నాకు గెలవడం తప్ప వేరే ఆప్షన్‌ లేదు’: వరుణ్‌ తేజ్‌

హైదరాబాద్‌: ‘‘నాకు గెలవడం తప్ప వేరే ఆప్షన్‌ లేదు’’ అని అంటున్నారు నటుడు వరుణ్‌ తేజ్‌. ఆయన ప్రధాన పాత్రలో నటించిన చిత్రం ‘గని’. కిరణ్‌ కొర్రపాటి దర్శకుడు. బాక్సింగ్‌ నేపథ్యంలో తెరకెక్కిన ఈ చిత్రం ఏప్రిల్‌ 8న ప్రేక్షకుల ముందుకు రానుంది. ఈ నేపథ్యంలో గురువారం ఉదయం ‘గని’ ట్రైలర్‌ను చిత్రబృందం విడుదల చేసింది. బాక్సింగ్‌ ఆడనని తన అమ్మకు మాటిచ్చిన ఓ యువకుడు.. బాక్సర్‌గా ఎలా మారాడు? నేషనల్‌ ఛాంపియన్‌ కావాలనే అతని కల నెరవేరిందా? అనే ఆసక్తికరమైన అంశాలతో ఈ చిత్రం రూపుదిద్దుకున్నట్లు ట్రైలర్‌ చూస్తే అర్థమవుతోంది. ‘‘ఆట గెలవాలంటే నేను గెలవాలి. ఎందుకంటే ఈ సమాజం ఎప్పుడూ గెలిచిన వాడి మాటే నమ్ముతుంది’’, ‘‘లైఫ్‌లో మంచోడ్ని కెలుకు, చెడ్డోడ్ని కెలుకు, కానీ నాలా ఆటని గెలిపించాలనే పిచ్చోడ్ని మాత్రం కెలక్కు’’ అంటూ ట్రైలర్‌ చివర్లో వరుణ్‌ చెప్పే డైలాగ్‌లు ఆకట్టుకునేలా ఉన్నాయి. సయీ మంజ్రేకర్‌ కథానాయిక. ఈ సినిమాలో ఉపేంద్ర, జగపతిబాబు, నదియా, సునీల్‌దత్‌ కీలకపాత్రలు పోషించారు.