Ileana: ఆసుపత్రిలో చేరిన ఇలియానా.. త్వరగా కోలుకోవాలంటున్న ఫ్యాన్స్‌

హైదరాబాద్‌: ‘దేవదాసు’(Devadasu) సినిమాతో టాలీవుడ్‌కు ఎంట్రీ ఇచ్చి ‘పోకిరి’(Pokiri) సినిమాతో  పాపులారిటీ సంపాదించుకుంది ఇలియానా(Ileana). ఆ తర్వాత తెలుగులో అగ్రహీరోల సరసన వరస ఆఫర్లు దక్కించుకుంది. అటు బాలీవుడ్‌లోనూ సినిమాలతో మెప్పిస్తోంది ఈ గోవా బ్యూటీ. తాజాగా ఇలియానా అనారోగ్యానికి గురైనట్లు తెలిపింది. ఆసుపత్రి బెడ్‌పై ఉన్న ఫొటోలను షేర్‌ చేసిన ఆమె. తనకు సకాలంలో మంచి వైద్యం అందించారని పేర్కొంది.

ఇక తన హెల్త్‌ అప్‌డేట్‌ను ఇన్‌స్టా స్టోరీలో పోస్ట్‌ చేసింది.‘‘ఒక రోజులో చాలా మార్పు వచ్చింది. డాక్టర్లు సెలైన్స్‌ పెట్టారు. నా ఆరోగ్యం గురించి తెలుసుకోవాలని చాలా మంది నాకు మెసేజ్‌లు పంపుతున్నారు. మీకు నా కృతజ్ఞతలు. మీ అందరి ప్రేమను పొందుతున్నందుకు నేనెంతో అదృష్టవంతురాలిని. ఇప్పుడు నా ఆరోగ్యం బాగానే ఉంది. డాక్టర్లు సరైన సమయంలో మంచి వైద్యం అందించారు’’ అని రాసింది. ఇది చూసిన ఫ్యాన్స్‌ త్వరగా కోలుకోవాలంటూ కామెంట్లు పెడుతున్నారు. తెలుగుతో పాటు పలు దక్షిణాది భాషల్లో నటించిన ఇలియానా చివరిసారి ‘ది బిగ్‌ బుల్‌’(The BigBull) అనే హిందీ సినిమాలో కనిపించింది. ప్రస్తుతం ‘అన్‌ఫెయిర్‌ అండ్‌ లవ్లీ’(Unfair&Lovely) అనే సినిమాతో ప్రేక్షకులను అలరించడానికి సిద్ధమైంది. కామెడీ చిత్రంగా తెరకెక్కిన ఈ సినిమా షూటింగ్‌ పూర్తయింది.