Salaar: ‘సలార్‌’ ఆ సినిమాకు రీమేక్‌..? ఈ రూమర్‌కు అసలు కారణమిదే!

హైదరాబాద్‌: ప్రభాస్‌ (Prabhas) కథానాయకుడిగా తెరకెక్కుతున్న సినిమా ‘సలార్‌’. ఇటీవలే దీని విడుదల తేదీ డిసెంబర్‌ 22గా ఖరారు చేశారు. అప్పటి నుంచి ఈ చిత్రంపై ఎన్నో వార్తలు నెట్టింట చక్కర్లు కొడుతున్నాయి. తాజాగా ‘సలార్’కు సంబంధించిన ఓ రూమర్ సినీప్రియుల్ని ఆందోళనకు గురిచేస్తోంది. అయితే దాన్ని ప్రభాస్‌ ఫ్యాన్స్‌ ఖండిస్తున్నారు.

ప్రశాంత్‌ నీల్‌ దర్శకత్వంలో 2014లో ‘ఉగ్రం’ అనే కన్నడ సినిమా రూపొంది విజయాన్ని అందుకుంది. ఈ చిత్రం ఇప్పటికే పలు భాషల్లో రీమేక్‌ అయింది. తాజాగా ‘సలార్‌’ దానికి రీమేక్‌ అని అంటున్నారు. కన్నడ ‘ఉగ్రం’ సినిమా సంగీత దర్శకుడు ఓ ఇంటర్య్వూలో మాట్లాడిన వీడియో ఇప్పుడు ఎక్స్‌లో కనిపిస్తోంది. అందులో ఆయన మాట్లాడుతూ..‘ఉగ్రంలో కన్నడ హీరో మురళీ చాలా బాగా చేశారు. ఇప్పుడు ప్రభాస్ ఆ పాత్రలో ఎలా చేస్తారా అని ఎదురుచూస్తున్నా. ప్రభాస్‌ తన యాక్టింగ్‌తో కచ్చితంగా ఆకట్టుకుంటారనే నమ్మకముంది’అని అన్నారు. దీంతో ఈ చిత్రం (Salaar) ‘ఉగ్రం’కు రీమేక్‌ అనే ప్రచారం జోరందుకుంది.

ఛారిటబుల్‌ ట్రస్ట్‌కు 25 ఏళ్లు.. చిరంజీవి ఆసక్తికర పోస్ట్‌

అయితే, ‘సలార్‌’ ప్రారంభ సమయంలోనూ ఇదే వార్త సోషల్‌ మీడియాలో చక్కర్లు కొట్టింది. దానిపై దర్శకుడు ప్రశాంత్‌ నీల్ స్పందించారు. తాను తీసే అన్ని సినిమాల్లో ‘ఉగ్రం’ షేడ్స్‌ ఉంటాయన్నారు. అది తన స్టైల్‌ అని అన్నారు. కానీ, ‘సలార్‌’ మాత్రం కొత్త స్టోరీ అని ఆయన స్పష్టం చేశారు. ఇది ఏ సినిమాకు రీమేక్‌ కాదని వెల్లడించారు. మరోవైపు ‘ఉగ్రం’ను యూట్యూబ్‌ నుంచి తొలగించారని వార్తలు వస్తున్నాయి. రీమేక్‌ కాబట్టే దాన్ని తొలగించారని కొందరు నెటిజన్లు అభిప్రాయపడుతున్నారు. దీన్ని ప్రభాస్‌ అభిమానులు ఖండిస్తున్నారు. కావాలనే ఇలాంటివి సృష్టిస్తున్నారని అంటున్నారు. ‘ఉగ్రం’ ఇప్పటికీ యూట్యూబ్‌లో అందుబాటులో ఉందని చెబుతున్నారు.