Bollywood: నిజమే.. రోజుకు రెండు కోట్ల పారితోషికం తీసుకున్నా: ప్రముఖ నటుడు

ముంబయి: ఎలాంటి సినిమా బ్యాక్‌గ్రౌండ్‌ లేకుండా బాలీవుడ్‌లో తనకంటూ మంచి గుర్తింపు తెచ్చుకుని ఎదిగిన నటుడు కార్తిక్‌ ఆర్యన్ (Kartik Aaryan)‌‌. గతేడాది ‘భూల్‌ భులయ్యా-2’(Bhool Bhulaiyaa 2) సినిమాతో ప్రేక్షకులను అలరించాడు. ఈ చిత్రంతో బాలీవుడ్‌లో ఒక్కసారిగా సెన్సేషనల్‌ స్టార్‌గా మారిపోయాడు ఈ యువనటుడు. అయితే, ఇటీవల ఈ యంగ్‌ హీరోకు సంబంధించిన ఓ వార్త నెట్టింట తెగ చక్కర్లు కొట్టిన విషయం తెలిసిందే. తన మొదటి సినిమాకు రూ.1.75 లక్షలు పారితోషికం తీసుకున్న కార్తిక్‌.. తాజాగా ఓ సినిమాలో 10 రోజులు నటించినందుకు ఏకంగా రూ.20కోట్లు తీసుకున్నాడనే వార్త వైరల్‌గా మారింది. తాజాగా ఓ ఇంటర్వ్యూలో మాట్లాడిన కార్తిక్‌ ఈ విషయంపై క్లారిటీ ఇచ్చాడు.

‘‘నేను కొవిడ్‌ సమయంలో నటించిన సినిమాకు రూ.20 కోట్ల రెమ్యునరేషన్‌ తీసుకున్న మాట నిజమే. కానీ నేను ఆ సినిమాను 10 రోజుల్లోనే పూర్తిచేశాను. దీని వల్ల నిర్మాతలకు ఎంతో లాభం వచ్చింది. కాబట్టి నేను ఆ స్థాయిలో రెమ్యునరేషన్‌ తీసుకోవడంలో ఎలాంటి తప్పు లేదు. ఇక గతేడాది నేను నటించిన హారర్‌ కామెడీ చిత్రం ‘భూల్‌ భులయ్యా-2’(Bhool Bhulaiyaa 2)మంచి విజయం సాధించింది. నేను వైవిధ్యభరితమైన కథలను ఎంచుకుంటూ ప్రేక్షకులను అలరించడానికి ఎంతో కష్టపడతాను. నా కష్టాన్ని చూస్తున్నారు కాబట్టే సినీ ప్రియులు నన్ను ఇంతగా ఆదరిస్తున్నారు. ప్రేక్షకుల ప్రేమే నాకు ముఖ్యం’’ అని చెప్పాడు. ఇక ప్రస్తుతం కార్తిక్‌.. అల్లు అర్జున్‌ నటించిన ‘అల వైకుంఠపురంలో’ సినిమా హిందీ రీమేక్‌లో నటిస్తున్నాడు.