Kiran Rao: ‘యానిమల్‌’ సినిమా చూడాలనుకుంటున్నా: కిరణ్‌రావ్‌

ఇంటర్నెట్‌ డెస్క్‌: తండ్రీ కొడుకుల అనుబంధం నేపథ్యంలో రూపొందిన ‘యానిమల్‌’ (Animal) మంచి విజయాన్ని అందుకుంది. దీనిని సందీప్‌ రెడ్డి వంగా తెరకెక్కించారు. త్వరలోనే దీనికి సీక్వెల్‌గా ‘యానిమల్‌ పార్క్‌’ రానుంది. ఈ సినిమాపై గతంలో ఆమిర్‌ ఖాన్‌ మాజీ భార్య కిరణ్‌ రావ్‌ (Kiran Rao) ఆసక్తికర వ్యాఖ్యలు చేసిన విషయం తెలిసిందే. ఇటీవల ఓ ఇంటర్వ్యూలో ఈ చిత్రం గురించి మాట్లాడారు. ‘‘కబీర్‌సింగ్‌’, ‘యానిమల్‌’ స్త్రీలపై ద్వేషం, వేధింపులు ప్రోత్సహించేలా ఉందని విమర్శించాను. కేవలం ఇది సందీప్‌రెడ్డి సినిమా అని నేను  ఆ వ్యాఖ్యలు చేయలేదు. స్త్రీలను ద్వేషించే వారికి వ్యతిరేకంగా ఇదివరకే మాట్లాడాను. స్త్రీలపై ద్వేషాన్ని పెంచే సినిమాలు ఎవరు చేసినా విమర్శిస్తాను. ఇప్పుడు నేను ఈ సినిమా చూడాలనుకుంటున్నా. ఎందుకంటే ప్రేక్షకులు యాక్షన్‌ సినిమాలను ఎక్కువగా ఇష్టపడుతున్నారు. అందరూ మెచ్చే సన్నివేశాలు అందులో ఏం ఉన్నాయో తెలుసుకోవాలని ఉంది. అప్పుడే ఆడియన్స్‌కు నచ్చేలా సినిమాలు రూపొందించగలను. సందీప్‌ రెడ్డి వంగా ఈ సినిమాను ఆసక్తికరంగా తీర్చిదిద్దారని విన్నాను. రణ్‌బీర్‌ అద్భుతమైన నటుడు’’ అని కిరణ్ రావ్‌ వెల్లడించారు. 

కిరణ్‌రావ్‌ దర్శకత్వం వహించిన ‘లాపతా లేడీస్‌’ చిత్రం ఇటీవల విడుదలైంది. ఆమిర్‌ ఖాన్‌ ప్రొడక్షన్స్‌, జియో స్టూడియోస్‌ సంయుక్తంగా ఈ చిత్రాన్ని నిర్మించాయి. కామెడీ డ్రామాగా రూపొందిన ఈ సినిమా మంచి ఆదరణ పొందినందుకు ఆనందంగా ఉందని కిరణ్‌ రావ్‌ పేర్కొన్నారు. ఈ సినిమా తనను ఎంతగానో కదిలించిందంటూ కథానాయిక జెనీలియా దేశ్‌ముఖ్‌ ప్రశంసలు కురిపించారు.