Game Changer: కొత్త షెడ్యూల్‌కు సిద్ధం

‘గేమ్‌ ఛేంజర్‌’ కోసం మళ్లీ రంగంలోకి దిగేందుకు సిద్ధమవుతున్నారు రామ్‌చరణ్‌. ఆయన కథానాయకుడిగా నటిస్తున్న ఈ పాన్‌ ఇండియా చిత్రాన్ని శంకర్‌ తెరకెక్కిస్తున్న సంగతి తెలిసిందే. దిల్‌ రాజు, శిరీష్‌ సంయుక్తంగా నిర్మిస్తున్నారు. కియారా అడ్వాణీ కథానాయిక. ఈ చిత్ర కొత్త షెడ్యూల్‌ సోమవారం నుంచి హైదరాబాద్‌లో మొదలు కానుందని సమాచారం. దాదాపు పది రోజుల పాటు సాగే ఈ షెడ్యూల్‌లో చరణ్‌తో పాటు మిగిలిన ప్రధాన తారాగణంపై కీలక సన్నివేశాలు చిత్రీకరించనున్నట్లు తెలుస్తోంది. రాజకీయ అంశాలతో నిండిన యాక్షన్‌ కథతో రూపొందుతోన్న ఈ చిత్రంలో రామ్‌చరణ్‌ భిన్న కోణాలున్న పాత్రలో కనిపించనున్నారు. అంజలి, ఎస్‌.జె.సూర్య, శ్రీకాంత్‌ తదితరులు కీలక పాత్రలు పోషిస్తున్నారు. తమన్‌ సంగీత దర్శకుడిగా, తిరు ఛాయాగ్రాహకుడిగా వ్యవహరిస్తున్నారు.