R.Madhavan: వేదాంత్‌ను స్టార్‌ కిడ్స్‌తో పోల్చడం ఇష్టం లేదు: మాధవన్‌

ఇంటర్నెట్‌ డెస్క్‌: ప్రముఖ హీరో ఆర్‌.మాధవన్‌ (R.Madhavan) తన కుమారుడిని ఇతర స్టార్స్ పిల్లలతో పోల్చడంపై అసంతృప్తి వ్యక్తం చేశారు. ఇటీవల ఓ పాడ్‌కాస్ట్‌ ఇంటర్వ్యూలో పాల్గొన్న ఆయన మాట్లాడారు. 
‘‘వేదాంత్‌ దేశంలో ఉన్న ప్రముఖుల్లో ఒకరు కాదు. కేవలం సెలబ్రిటీ కుమారుడు కావడంతో అతని గురించి తెలుసుకోవడంపై శ్రద్ధ చూపిస్తున్నారు. కానీ, అతనిని ఇతర సెలబ్రిటీ పిల్లలతో పోల్చడం నాకు, నా భార్య సరితకు ఇష్టం లేదు.  అలాంటి వాటిని మేము అంగీకరించాలనుకోవడం లేదు. ఇప్పటివరకూ వేదాంత్‌ తన టాలెంట్‌తోనే విజయం సాధించాడు.  ఒక నటుడి కుమారుడు జాతీయస్థాయిలో పతకాలు అందుకున్నాడు. అది అంత తేలికైన విషయం కాదు.  సోషల్‌ మీడియాలో అతనిపై వచ్చే మీమ్స్‌ గురించి పట్టించుకోవడం లేదు. మీమ్స్‌ కారణంగా ఎదుటివారు ఇబ్బంది పడుతున్నారు. ఈ విషయాన్ని వాటిని సృష్టించేవారు తెలుసుకోలేకపోతున్నారు’’ అని మాధవన్‌ పేర్కొన్నారు. 

అజయ్‌ దేవగణ్‌ హీరోగా నటించిన ‘షైతాన్‌’(Shaitaan) చిత్రంలో మాధవన్‌ నెగిటివ్‌ పాత్ర పోషించారు. హారర్ థ్రిల్లర్‌గా వికాశ్‌భల్‌ ఈ చిత్రాన్ని తెరకెక్కించారు. ఇందులో జ్యోతిక కీలక పాత్ర పోషించారు. మార్చి 8న విడుదలైన ఈ చిత్రం ప్రేక్షకులను థ్రిల్‌ చేస్తుంది.