Nayantara: మనసు చెప్పినట్టు వింటే మీరూ సూపర్‌స్టారే!

‘మీరు మీ మనసు చెప్పినట్టు నడుచుకుంటే మిలియన్‌లో ఒక్కరు మాత్రమే కాదు.. ప్రతి వ్యక్తి సూపర్‌స్టార్‌గా మారవచ్చు’ అని అంటోంది కథానాయిక నయనతార. మరి ఆమె ఏ విషయంలో సూపర్‌స్టార్‌గా మారాలనుకుంటోంది? దీని కోసం ఎలాంటి పరిస్థితులను ఎదుర్కొంది? అనేది తెలియాలంటే ‘అన్నపూరణి’ చూడాల్సిందే. ఆమె ప్రధాన పాత్రలో నటిస్తున్న చిత్రమిది. నీలేష్‌ కృష్ణ ఈ చిత్రాన్ని తెరకెక్కిస్తున్నారు. తాజాగా ఈ సినిమా ట్రైలర్‌ను విడుదల చేసింది చిత్రబృందం. ఇందులో అన్నపూరణి పాత్రలో కనిపించనుంది నయన. ‘పగటి కలలు కనొద్దు. ప్రతి వీధి క్రికెట్‌ ఆటగాడు సచిన్‌ తెందూల్కర్‌ కాలేడు. అలాగే ప్రతి బస్‌ కండక్టర్‌ సూపర్‌ స్టార్‌ కాలేడు’ లాంటి సంభాషణలతో సాగుతున్న ఈ ట్రైలర్‌ ప్రేక్షకులను ఆకట్టుకుంటోంది. బ్రాహ్మణ కుటుంబానికి చెందిన ఓ అమ్మాయి... ఇండియన్‌ బెస్ట్‌ ఛెఫ్‌గా ఎదగాలనుకున్న కలను ఎలా నెరవేర్చుకుందో ఈ సినిమాలో చూపించనున్నారు. సత్యరాజ్‌, జై కీలక పాత్రలు పోషిస్తున్న ఈ సినిమా డిసెంబరు 1న విడుదల కానుంది.