Tamannaah: శివశక్తి.. ఢమరుకం పట్టి

‘ఓదెల 2’తో ప్రేక్షకుల్ని థ్రిల్‌ చేసేందుకు సిద్ధమవుతోంది తమన్నా. ఆమె ప్రధాన పాత్రలో నటిస్తున్న ఈ చిత్రాన్ని అశోక్‌ తేజ తెరకెక్కిస్తున్నారు. సంపత్‌ నంది టీమ్‌ వర్క్స్‌, మధు క్రియేషన్స్‌ సంస్థలు సంయుక్తంగా నిర్మిస్తున్నాయి. మహా శివరాత్రి సందర్భంగా శుక్రవారం ఈ సినిమా నుంచి తమన్నా ఫస్ట్‌లుక్‌ విడుదల చేశారు. ఆ ప్రచార చిత్రంలో ఆమె నాగ సాధువులా వేషం ధరించి.. ఒక చేతిలో దండము.. మరో చేతిలో ఢమరుకము పట్టుకొని ఆసక్తికరంగా కనిపించింది. తను ఇందులో శివశక్తి పాత్ర పోషిస్తున్నట్లు ఈ పోస్టర్‌తో స్పష్టత ఇచ్చారు. ‘‘ఓదెల మల్లన్న స్వామి తన గ్రామాన్ని దుష్టశక్తుల నుంచి ఎలా రక్షిస్తాడనే ఆసక్తికర అంశంతో ఈ చిత్రం రూపొందనుంది’’ అని చిత్ర వర్గాలు తెలిపాయి. ‘ఓదెల రైల్వేస్టేషన్‌’కు కొనసాగింపుగా తెరకెక్కుతోన్న ఈ సినిమాకి అజనీష్‌ లోక్‌నాథ్‌ సంగీతమందిస్తున్నారు. ఎస్‌.సౌందర్‌ రాజన్‌ ఛాయాగ్రాహకుడిగా వ్యవహరిస్తున్నారు.