Rajinikanth: ‘జైలర్‌’ రిలీజ్‌.. థియేటర్‌లో ధనుష్‌, అనిరుధ్‌, లతా రజనీ సందడి

ఇంటర్నెట్‌డెస్క్‌: సూపర్‌స్టార్‌ రజనీకాంత్‌ (Rajiniknath) నటించిన యాక్షన్‌ ఎంటర్‌టైనర్‌ ‘జైలర్‌’ (Jailer). నెల్సన్‌ దిలీప్‌కుమార్‌ (Nelson Dileep Kumar) దర్శకుడు. మాఫియా, ప్ర‌తీకార నేప‌థ్యం, కుటుంబ అంశాల మేళ‌వింపుగా రూపొందిన ఓ రిటైర్డ్ పోలీస్ అధికారి క‌థతో ఇది సిద్ధమైంది. ప్రపంచవ్యాప్తంగా ఈ సినిమా విడుదలైన థియేటర్ల వద్ద రజనీ అభిమానులు సందడి చేస్తున్నారు. ముత్తు పాత్రలో రజనీ నటన అత్యద్భుతంగా ఉందని, చాలారోజుల తర్వాత ఆయన్ని పవర్‌ఫుల్‌ రోల్‌లో చూడటం ఆనందంగా ఉందంటూ నెట్టింట కామెంట్స్‌ పెడుతున్నారు. చిత్ర దర్శకుడు నెల్సన్‌, సంగీత దర్శకుడు అనిరుధ్‌పై ప్రశంసల వర్షం కురిపిస్తున్నారు.

రివ్యూ: ‘జైలర్‌’.. రజనీకాంత్‌ కొత్త మూవీ ఎలా ఉందంటే?

చెన్నైలోని ఓ థియేటర్‌లో రజనీ కుటుంబ సభ్యులు సందడి చేశారు. అభిమానులతో కలిసి చిత్రాన్ని వీక్షించారు. అనంతరం, రజనీ సతీమణి లత, కుమార్తెలు భారీ కేక్‌ను కట్‌ చేశారు. సినిమా పట్ల ఆనందాన్ని వ్యక్తం చేశారు. మరోవైపు నటుడు ధనుష్‌ సైతం చెన్నైలోని రోహిణి థియేటర్‌లో ‘జైలర్‌’ను వీక్షించారు. ఓ థియేటర్‌లో అనిరుధ్‌ ‘జైలర్‌’ పాట పాడి అలరించారు. దీనికి సంబంధించిన కొన్ని ఫొటోలు నెట్టింట వైరల్‌గా మారాయి.

2021లో విడుదలైన ‘అన్నాత్తె’ తర్వాత రజనీ నటించిన చిత్రం ‘జైలర్‌’. రమ్యకృష్ణ, జాకీష్రాఫ్‌, శివరాజ్‌కుమార్‌, యోగిబాబు, సునీల్‌, నాగబాబు తదితరులు ఈ సినిమాలో నటించారు. మోహన్‌లాల్‌ అతిథి పాత్రలో మెరిశారు. సన్‌ పిక్చర్స్‌ పతాకంపై ఈ చిత్రాన్ని నిర్మించారు. అనిరుధ్‌ స్వరాలు అందించారు.