Rathnam: విశాల్‌- హరి కాంబో.. ఈసారి రక్తపాతమే.. టీజర్‌ చూశారా!

ఇంటర్నెట్‌ డెస్క్‌: ‘భరణి’ (తమిళంలో.. Thaamirabharani) సినిమాతో హిట్‌ కాంబినేషన్‌గా నిలిచారు హీరో విశాల్‌ (Hero Vishal), డైరెక్టర్‌ హరి (Director Hari). ఈ కాంబోలో రెండో సినిమాగా ‘పూజ’ (Poojai) తెరకెక్కింది. దాదాపు తొమ్మిదేళ్ల తర్వాత మరోసారి వీరిద్దరూ ఓ సినిమా కోసం కలిసి పనిచేస్తున్నారు. ఈ వివరాలను సోషల్‌ మీడియా వేదికగా పంచుకున్నారు. తమ సినిమాకు ‘రత్నం’ (Rathnam) టైటిల్‌ని ఖరారు చేసినట్లు తెలియజేస్తూ ఫస్ట్‌ షాట్‌ టీజర్‌ విడుదల చేశారు. ఓ మైదానంలో వరుసగా లారీలు వెళ్తుంటే వాటి ముందు బర్రెలు, గుర్రాలు గుంపులుగా పరిగెత్తడం, దేవుడి విగ్రహాల ముందు ఓ వ్యక్తి మోకాళ్లపై కూర్చొని ఉండగా విశాల్‌ వెళ్లి అతడి తల నరకడం, నేలపై పడిన ఓ రక్తపు చుక్క ‘రత్నం’ టైటిల్‌గా మారడంవంటి సన్నివేశాలు వీడియోలో కనిపించాయి. దీన్నిబట్టి ఈసారి విశాల్- హరి తమ సినిమాలో రక్తపాతాన్ని చూపించనున్నట్లు తెలుస్తోంది.

ప్రభాస్‌ ‘సలార్‌’ ట్రైలర్‌ వచ్చేసింది.. మరిన్ని అంచనాలు పెంచేలా..!

ఈ సినిమాలో విశాల్‌ సరసన ప్రియా భవానీ శంకర్‌ నటిస్తోంది. సముద్రఖని, గౌతమ్‌ వాసుదేవ్‌ మేనన్‌, యోగిబాబు కీలక పాత్రలు పోషిస్తున్నారు. విశాల్‌- సంగీత దర్శకుడు దేవిశ్రీ ప్రసాద్‌ కాంబినేషన్‌లో రూపొందుతున్న సినిమా ఇదే కావడం గమనార్హం. విశాల్‌కు ఇది 34వ చిత్రం. వచ్చే ఏడాది వేసవిలో విడుదల చేసేందుకు సన్నాహాలు చేస్తున్నారు. విశాల్‌ ఇటీవల ‘మార్క్‌ ఆంటోని’ చిత్రంతో ప్రేక్షకులను అలరించారు. ఆ సినిమా ఓటీటీ ‘అమెజాన్‌ ప్రైమ్‌ వీడియో’లో స్ట్రీమింగ్‌ అవుతోంది.