Shahrukh Khan: మహేశ్.. నీతో కలిసి సినిమా చూడాలనుకుంటున్నా: షారుఖ్‌

ఇంటర్నెట్‌డెస్క్‌: బాలీవుడ్‌ నటుడు షారుఖ్‌ ఖాన్‌ (Shah Rukh Khan) నటించిన ‘జవాన్‌’ (Jawan) చిత్రాన్ని కుటుంబంతో కలిసి తాను చూడాలనుకుంటున్నట్లు నటుడు మహేశ్‌బాబు (Mahesh Babu) తాజాగా ట్వీట్‌ చేశారు. ఈ చిత్రం బ్లాక్‌బస్టర్‌ విజయం అందుకోవాలంటూ ఆయన కోరుకున్నారు. దీనిపై షారుఖ్‌ స్పందిస్తూ మహేశ్‌తో కలిసి తాను కూడా మూవీ టైమ్‌ను ఎంజాయ్‌ చేయాలనుకుంటున్నట్లు చెప్పారు.

‘‘థ్యాంక్యూ సో మచ్‌ మై ఫ్రెండ్‌. ‘జవాన్‌’ నీకు నచ్చుతుందని అనుకుంటున్నా. నువ్వు ఎప్పుడు ఈ సినిమా చూడాలనుకుంటున్నావో చెబితే.. నేనూ నీతో కలిసి సినిమాకి వస్తా. నీకు, నీ కుటుంబానికి నా ప్రేమపూర్వక అభినందనలు’’ అని షారుఖ్‌ ట్వీట్‌ చేశారు. ప్రస్తుతం ఇది సీని ప్రియుల దృష్టిని ఆకర్షిస్తోంది.

ఆ విషయంలో నయన్‌కు తొలి చిత్రం.. అడ్వాన్స్‌ బుకింగ్స్‌లో రికార్డు.. ‘జవాన్‌’ విశేషాలివీ!

షారుఖ్‌ - మహేశ్‌ మంచి స్నేహితులనే విషయం తెలిసిందే. గతంలో ‘బ్రహ్మోత్సవం’ సెట్‌కి షారుఖ్‌ ప్రత్యేకంగా వెళ్లి మహేశ్‌ను కలిశారు. కాసేపు సరదాగా మాట్లాడుకున్నారు. ఈ ఫొటోలు అప్పట్లో వైరల్‌గా మారాయి.

ఇక, జవాన్‌ విషయానికి వస్తే,.. అట్లీ - షారుఖ్‌ కాంబోలో తెరకెక్కిన చిత్రమిది. యాక్షన్‌ ఎంటర్‌టైనర్‌గా ఇది సిద్ధమైంది. ఇందులో షారుఖ్‌ దాదాపు 7 గెటెప్స్‌లో కనిపించనున్నారు. నయనతార కథానాయిక. దీపికా పదుకొణె అతిథి పాత్రలో కనిపించనున్నారు. ఇప్పటికే విడుదలైన ప్రచార చిత్రాలు సినిమాపై అంచనాలు పెంచాయి. తాజా సమాచారం ప్రకారం ఈ సినిమాలో సంజయ్‌ దత్‌, విజయ్‌, అల్లు అర్జున్‌ అతిథి పాత్రలు పోషించినట్లు తెలుస్తోంది. సినిమాలోని ఓ కీలక సన్నివేశంలో సంజయ్‌ దత్‌ (హిందీ వెర్షన్‌) కనిపించనున్నారని తెలుస్తోంది. తమిళ వెర్షన్‌లో అదే పాత్రను విజయ్‌.. తెలుగులో అల్లు అర్జున్‌ పోషించనున్నట్లు వార్తలు వస్తున్నాయి.