sitamma vakitlo sirimalle chettu: పెద్దోడి పాత్రలో పవన్‌కల్యాణ్‌..

హైదరాబాద్‌: వెంకటేశ్‌, మహేశ్‌బాబు కీలక పాత్రల్లో శ్రీకాంత్‌ అడ్డాల దర్శకత్వంలో తెరకెక్కిన మల్టీస్టారర్‌ ‘సీతమ్మ వాకిట్లో సిరిమల్లె చెట్టు’(Seethamma Vakitlo Sirimalle Chettu). 2013లో విడుదలైన ఈ సినిమా బాక్సాఫీస్‌ వద్ద ఘన విజయాన్ని అందుకోవడమే కాకుండా, మల్టీస్టారర్‌ మూవీలకు మళ్లీ పునాదులు వేసింది. అయితే, తొలుత ఈ సినిమాలో పెద్దోడు, చిన్నోడి పాత్రల కోసం పవన్‌కల్యాణ్‌, మహేశ్‌బాబులను అనుకున్నారట. తాజాగా ఈ విషయాన్ని ఆయనే స్వయంగా వెల్లడించారు.

శ్రీకాంత్‌ అడ్డాల స్వీయ దర్శకత్వంలో రూపొందిన యాక్షన్‌ థ్రిల్లర్‌ ‘పెదకాపు-1’. అన్ని కార్యక్రమాలు పూర్తి చేసుకున్న ఈ సినిమా సెప్టెంబరు 29న విడుదల కానుంది. సినిమా ప్రమోషన్స్‌లో పాల్గొన్న ఆయన్ను ‘పవన్‌కల్యాణ్‌తో సినిమా అనుకుని ఎందుకు తీయలేదు’ అని ప్రశ్నించగా, ‘సీతమ్మ వాకిట్లో సిరిమల్లె చెట్టు మూవీలో పెద్దోడి పాత్ర కోసం పవన్‌ను అనుకున్నా. కానీ, కుదరలేదు. ఆ తర్వాత కాంబినేషన్స్‌ మారిపోయాయి’ అని చెప్పారు. అయితే, అప్పట్లో మరో టాక్‌ కూడా నడిచింది. వెంకటేశ్‌, పవన్‌ కలిసి ఆ సినిమా చేస్తారని అన్నారు. అయితే, వాళ్లిద్దరూ కలిసి ‘గోపాల గోపాల’లో నటించారు. ఇక పవన్‌ ‘జల్సా’ మూవీకి మహేశ్‌బాబు వాయిస్‌ ఇచ్చిన సంగతి తెలిసిందే.