Sriya Reddy: ‘రాధా రమ’.. నాకు ఇచ్చినందుకు ధన్యవాదాలు: శ్రియారెడ్డి

ఇంటర్నెట్‌డెస్క్‌: ‘సలార్‌’ (Salaar)లో కీలకమైన రాధా రమ పాత్రకు తనను ఎంచుకున్నందుకు  దర్శకుడు ప్రశాంత్‌ నీల్‌ (Prasanth Neel)కు నటి శ్రియా రెడ్డి (Shriya Reddy) ధన్యవాదాలు చెప్పారు. తనకు చెప్పినట్టుగానే స్క్రీన్‌పైకి రాధారమ పాత్రను తీసుకువచ్చారన్నారు. షూట్‌లో భాగంగా దర్శకుడితో దిగిన ఓ ఫొటోని షేర్‌ చేసిన ఆమె.. ‘‘ప్రశాంత్‌.. రాధారమ పాత్రను స్క్రీన్‌పై ఎంతో పవర్‌ఫుల్‌గా చూపించావు. ‘రాధారమ ఎప్పుడూ నవ్వదు’ అంటూ ఈ పాత్రను ఉద్దేశించి సెట్‌లో నువ్వు చెప్పిన మాటలు నాకింకా గుర్తు ఉన్నాయి. ఒక మహిళ కోసం ఇలాంటి అద్భుతమైన పాత్రను రూపొందించడానికి నిజంగా ధైర్యం కావాలి. ఈ పాత్రతో నా కంఫర్ట్‌ జోన్‌ నుంచి నన్ను బయటకు తీసుకువచ్చినందుకు ధన్యవాదాలు’’ అని ఆమె రాసుకొచ్చారు. దీనిని చూసిన నెటిజన్లు.. ‘సలార్‌’లో మీ యాక్టింగ్‌ బాగుందంటూ పోస్టులు పెడుతున్నారు.

Salaar Review: రివ్యూ: సలార్‌.. ప్రభాస్‌ ఖాతాలో హిట్‌ పడిందా?

యాంకర్‌గా కెరీర్‌ మొదలుపెట్టిన శ్రియారెడ్డి.. ‘అప్పుడప్పుడు’ అనే చిత్రంతో తెలుగులోకి ఎంట్రీ ఇచ్చారు. విశాల్‌ హీరోగా నటించిన ‘పొగరు’ ఆమెకు మంచి పేరు తెచ్చిపెట్టింది. ఇందులో ఆమె నెగెటివ్‌ షేడ్స్‌ ఉన్న పాత్రలో కనిపించారు. ఆ సినిమా తర్వాత ఆమెకు అవకాశాలు వరుస కట్టాయి. శుక్రవారం విడుదలైన ‘సలార్‌’ శ్రియారెడ్డికి మంచి పేరు తెచ్చిపెట్టింది. ఇందులో ఆమె పృథ్వీరాజ్‌ సుకుమారన్‌ సోదరిగా రాధారమ పాత్ర పోషించారు.