vijay devarakonda: విజయ్‌ కోసం మరొకటి

ఈ వేసవిలో ‘ఫ్యామిలీస్టార్‌’గా ప్రేక్షకుల్ని పలకరించనున్నారు విజయ్‌ దేవరకొండ. ముగింపు దశలో ఉన్న ఈ సినిమా పూర్తి కాగానే.. గౌతమ్‌ తిన్ననూరి చిత్రాన్ని తిరిగి మొదలు పెట్టేందుకు సన్నాహాలు చేసుకుంటున్నారు. ఇవి కాక రవికిరణ్‌ కోలా దర్శకత్వంలోనూ విజయ్‌ ఓ సినిమా చేయాల్సి ఉంది. కాగా.. ఇప్పుడాయన కోసం దర్శకుడు రాహుల్‌ సంకృత్యాన్‌ ఓ కథ సిద్ధం చేశారని సమాచారం. ఇప్పటికే ఇరువురి మధ్య కథా చర్చలు జరిగాయని.. స్క్రిప్ట్‌ నచ్చడంతో రాహుల్‌ సినిమా చేసేందుకు విజయ్‌ సానుకూలంగా ఉన్నారని తెలిసింది. దీన్ని మైత్రీ మూవీ మేకర్స్‌ సంస్థ నిర్మించనున్నట్లు తెలుస్తోంది. గతంలో విజయ్‌ - రాహుల్‌ కలయికలో ‘టాక్సీవాలా’ సినిమా వచ్చిన సంగతి తెలిసిందే. ఇది బాక్సాఫీస్‌ ముందు చక్కటి విజయాన్ని అందుకుంది.