ప్రిక్వార్టర్స్‌లో నీతు, ప్రీతి, మంజు

ప్రపంచ మహిళల బాక్సింగ్‌

దిల్లీ: ప్రపంచ మహిళల బాక్సింగ్‌ ఛాంపియన్‌షిప్స్‌లో భారత బాక్సర్లు సూపర్‌ పంచ్‌లతో పతకాల వేటలో సాగుతున్నారు. స్వదేశంలో జరుగుతున్న ఈ పోటీల్లో నీతు (48 కేజీలు), ప్రీతి (54), మంజు (66) శనివారం ప్రిక్వార్టర్స్‌లో అడుగుపెట్టారు. కామన్వెల్త్‌ క్రీడల పసిడి విజేత నీతు ఈ టోర్నీలో తన తొలి పోరులో దోయన్‌ కాంగ్‌ (కొరియా)ను చిత్తుచేసింది. తొలి రౌండ్లోనే ప్రత్యర్థిని మట్టికరిపించింది. హుక్‌, క్రాస్‌ పంచ్‌లతో చెలరేగిన ఆమె ధాటికి కాంగ్‌ నిలవలేకపోయింది. దీంతో రిఫరీ బౌట్‌ ఆపేసి నీతును విజేతగా ప్రకటించాడు. మరోవైపు మంజు 5-0 తేడాతో కారా వారెరా (న్యూజిలాండ్‌)పై ఏకపక్ష విజయం సాధించింది. బౌట్లో ముష్ఠిఘాతాలతో రెచ్చిపోయిన మంజు.. ప్రత్యర్థిపై పూర్తి ఆధిపత్యం చలాయించింది. ఇక తన రెండో రౌండ్లో ప్రీతి 4-3 తేడాతో లాక్రామియోరా (రొమేనియా)పై పోరాడి గెలిచింది. బాక్సర్లిద్దరూ హోరాహోరీగా తలపడడంతో ఆరంభం నుంచే పోరు రసవత్తరంగా సాగింది. తొలి రౌండ్‌లో ప్రీతి 3-2తో పైచేయి సాధించింది. కానీ రెండో రౌండ్‌లో పుంజుకున్న ప్రత్యర్థి 3-2తో ఆధిక్యంలో నిలిచింది. దీంతో చివరి రౌండ్‌ ఉత్కంఠభరితంగా మారింది. చివరి మూడు నిమిషాల్లో ఇద్దరు బాక్సర్లు గెలుపు కోసం హోరాహోరీగా తలపడ్డారు. దీంతో ఈ రౌండ్‌ డ్రాగా ముగిసింది. చివరకు సమీక్షలో ప్రీతిని విజేతగా తేల్చారు.