BAN vs SL - Asia Cup 2023: తడబడ్డాకొట్టేశారు

బంగ్లాపై లంక గెలుపు
మెరిసిన అసలంక, సమరవిక్రమ
సత్తా చాటిన పతిరన, తీక్షణ

ఆసియాకప్‌లో డిఫెండింగ్‌ ఛాంపియన్‌ శ్రీలంకతో మ్యాచ్‌లో స్లో పిచ్‌పై మొదట బంగ్లా అతి కష్టం మీద 164 పరుగులు చేసింది. ఈ చిన్న స్కోరును ఛేదించడానికి లంక బాగా ఇబ్బంది పడింది. ఒక దశలో కుప్పకూలుతుందా అనిపించింది. కానీ అసలంక, సమరవిక్రమ పోరాటంతో నిలిచి గెలిచిన ఆ జట్టు టోర్నీలో బోణీ కొట్టింది. ఇది లంకకు వన్డేల్లో వరుసగా పదకొండో విజయం కావడం విశేషం.

పల్లెకెలె : వన్డే ఫార్మాట్లో ఇప్పటికే వరుసగా పది విజయాలు సాధించిన శ్రీలంక.. ఆసియా కప్‌లోనూ శుభారంభం చేసింది. గురువారం గ్రూప్‌-బి మ్యాచ్‌లో లంక 5 వికెట్ల తేడాతో బంగ్లాదేశ్‌ను ఓడించింది. మొదట ‘మ్యాన్‌ ఆఫ్‌ ద మ్యాచ్‌’ పతిరన (4/32), తీక్షణ (2/19) దెబ్బకు బంగ్లా 164కే ఆలౌటైంది. నజ్ముల్‌  శాంటో (89; 122 బంతుల్లో 7×4) టాప్‌స్కోరర్‌.లంక 39 ఓవర్లలో 5 వికెట్లు కోల్పోయి లక్ష్యాన్ని అందుకుంది. అసలంక (62 నాటౌట్‌; 92 బంతుల్లో 5×4, 1×6), సమరవిక్రమ (54; 77 బంతుల్లో 6×4) జట్టు విజయంలో కీలకపాత్ర పోషించారు.

వాళ్లిద్దరూ నిలిచారు: లక్ష్యం చిన్నదే అయినా లంక ఆట కూడా బంగ్లా ఇన్నింగ్స్‌నే తలపించింది. బంతి బ్యాట్‌పైకి రాకపోవడంతో అనవసర షాట్లకు పోయిన ఆ జట్టు బ్యాటర్లు వికెట్లు పారేసుకున్నారు. దీంతో 9.2 ఓవర్లలో 43/3తో లంక ఇబ్బందుల్లో పడిపోయింది. ఈ స్థితిలో అసలంక, సమరవిక్రమ జోడీ నిలిచింది. క్రీజులో కుదురుకోవడానికి సమయం తీసుకున్న ఈ ద్వయం.. నెమ్మదిగా జోరు పెంచింది. వీలుచిక్కినప్పుడల్లా బంతిని బౌండరీని తరలించి స్కోరు కరిగించింది. ముఖ్యంగా పుల్‌, స్వీప్‌ షాట్లతో పరుగులు రాబట్టిన అసలంక.. మెహదీ హసన్‌ బౌలింగ్‌లో డీప్‌లో ఓ మెరుపు సిక్స్‌ కూడా బాదాడు. అయితే లక్ష్యానికి సమీపంగా ఉన్నప్పుడు సమరవిక్రమతో పాటు ధనంజయ (2) వికెట్లు పడినా.. కెప్టెన్‌ శానక (14 నాటౌట్‌)తో కలిసి అసలంక మరో వికెట్‌ పడకుండా జట్టును గెలిపించాడు. బంగ్లా బౌలర్లలో షకిబ్‌ (2/29) రాణించాడు.

బంగ్లా కట్టడి: అంతకుముందు బంతి నెమ్మదిగా కదులుతున్న పిచ్‌పై టాస్‌ గెలిచి బ్యాటింగ్‌ ఎంచుకున్న బంగ్లాదేశ్‌ బాగా ఇబ్బంది పడింది. పతిరన, తీక్షణ కట్టుదిట్టంగా బంతులు వేయడంతో పరుగులు చేయలేకపోగా.. వికెట్లు కూడా చేజార్చుకుంది. 12 ఓవర్లకు బంగ్లా చేసింది 43 పరుగులే. పైగా 3 వికెట్లు కోల్పోయింది. దీనికి తోడు వర్షం అంతరాయం కలిగించిన తర్వాత పిచ్‌ బ్యాటింగ్‌కు మరింత క్లిష్టంగా మారింది. ఈ స్థితిలో నజ్ముల్‌ శాంటో నిలిచాడు. వీలు చిక్కినప్పుడల్లా బంతిని బౌండరీ దాటిస్తూ రన్‌రేట్‌ పడిపోకుండా చూశాడు. కానీ వికెట్ల పతనం మాత్రం ఆగలేదు. తౌహిద్‌ (20) తప్ప ఎవరూ శాంటోకు పెద్దగా సహకారం అందించలేదు. దీంతో 41 ఓవర్లకు 162/7తో నిలిచిన బంగ్లా.. ఓవర్‌ తేడాతో శాంటోతో పాటు తస్కిన్‌ (0), ముస్తాఫిజుర్‌ (0) వికెట్లు కోల్పోయి అనుకున్న దానికంటే తక్కువ స్కోరుకే ఆలౌటైంది.
బంగ్లాదేశ్‌ ఇన్నింగ్స్‌: నయీం (సి) నిశాంక (బి) ధనంజయ 16; తంజిద్‌ ఎల్బీ (బి) తీక్షణ 0; నజ్ముల్‌ శాంటో (బి) తీక్షణ 89; షకిబ్‌ (సి) కుశాల్‌ (బి) పతిరన 5; తౌహిద్‌ ఎల్బీ (భి) శానక 20; ముష్ఫికర్‌ (సి) కరుణరత్నే (బి) పతిరన 13; మిరాజ్‌ రనౌట్‌ 5; మెహదీ హసన్‌ ఎల్బీ (బి) వెల్లలాగె 6; తస్కిన్‌ (సి) తీక్షణ (బి) పతిరన 0; షోరిఫుల్‌ నాటౌట్‌ 2; ముస్తాఫిజుర్‌ ఎల్బీ (బి) పతిరన 0; ఎక్స్‌ట్రాలు 8 మొత్తం: (42.4 ఓవర్లలో ఆలౌట్‌) 164; వికెట్ల పతనం: 1-4, 2-25, 3-36, 4-95, 5-127, 6-141, 7-162, 8-162, 9-164; బౌలింగ్‌: రజిత 7-0-29-0; తీక్షణ 8-1-19-2; ధనంజయ 10-0-35-1; పతిరన 7.4-0-32-4; వెల్లలాగె 7-0-30-1; శానక 3-0-16-1

శ్రీలంక ఇన్నింగ్స్‌: నిశాంక (సి) ముష్ఫికర్‌ (బి) షోరిఫుల్‌ 14; కరుణరత్నే (బి) తస్కిన్‌ 1; కుశాల్‌ మెండిస్‌ (బి) షకిబ్‌ 5; సమరవిక్రమ (స్టంప్డ్‌) ముష్ఫికర్‌ (బి) మెహదీ హసన్‌ 54; అసలంక నాటౌట్‌ 62; ధనంజయ డిసిల్వా (బి) షకిబ్‌ 2; శానక నాటౌట్‌ 14; ఎక్స్‌ట్రాలు 13 మొత్తం: (39 ఓవర్లలో 5 వికెట్లకు) 165; వికెట్ల పతనం: 1-13, 2-15, 3-43, 4-121, 5-128; బౌలింగ్‌: తస్కిన్‌ అహ్మద్‌ 7-1-34-1; షోరిఫుల్‌ ఇస్లాం 4-0-23-1; షకిబ్‌ 10-2-29-2; ముస్తాఫిజుర్‌ 3-0-12-0; మిరాజ్‌ 5-0-26-0; మెహదీ హసన్‌ 10-0-35-1