Breaking | Feedback | ePratibha | E-PAPER | Pratibha

NED vs BAN: బంగ్లాదేశ్‌ను చిత్తుగా ఓడించిన నెదర్లాండ్స్‌

ప్రపంచకప్‌లో భాగంగా బంగ్లాదేశ్‌తో జరిగిన మ్యాచ్‌లో నెదర్లాండ్స్‌ ఘన విజయం సాధించింది. 87 పరుగుల తేడాతో ఆ జట్టుని నెదర్లాండ్స్‌ చిత్తుగా ఓడించింది.

Updated : 28 Oct 2023 21:34 IST

కోల్‌కతా: ప్రపంచకప్‌లో భాగంగా బంగ్లాదేశ్‌తో జరిగిన మ్యాచ్‌లో నెదర్లాండ్స్‌ ఘన విజయం సాధించింది. 87 పరుగుల తేడాతో ఆ జట్టుని నెదర్లాండ్స్‌ చిత్తుగా ఓడించింది. తొలుత బ్యాటింగ్ చేసిన నెదర్లాండ్స్‌.. నిర్ణీత 50 ఓవర్లలో 229 పరుగులకు ఆలౌటైంది. ఈ మోస్తరు లక్ష్యఛేదనలో బంగ్లాదేశ్‌ 142 పరుగులకే కుప్పకూలింది. టాప్‌-6 బ్యాటర్లలో ఇద్దరు మాత్రమే రెండంకెల స్కోరు చేశారు. మెహదీ హసన్ మిరాజ్ (35) టాప్‌స్కోరర్‌గా నిలవగా.. తాంజిద్‌ హసన్ (15) పరుగులు చేశాడు. లిట్టన్ దాస్ (3), నజ్ముల్ హొస్సేన్ శాంటో (9), షకీబ్‌ అల్‌ హసన్ (5), ముష్ఫికర్‌ రహీమ్ (1) ఘోరంగా విఫలమయ్యారు. మహ్మదుల్లా (20), మోహదీ హసన్ (17) పరుగులు చేశారు. నెదర్లాండ్స్‌ బౌలర్లలో పాల్ వాన్ మీకెరెన్ 4, బాస్‌ డీ లీడే 2, ఆర్యన్ దత్‌, వాన్‌ బీక్, అకెర్మాన్‌ ఒక్కో వికెట్ పడగొట్టారు.

లక్ష్యఛేదనలో బంగ్లా ఏ దశలోనూ గట్టిగా పోరాడలేకపోయింది. ఆరంభం నుంచి నెమ్మదిగా ఆడిన లిట్టన్‌దాస్‌ను ఆర్యన్‌ దత్‌ నాలుగో ఓవర్‌లో వెనక్కి పంపగా.. వాన్‌ బీక్‌ వేసిన తర్వాతి ఓవర్‌లో తాంజిద్‌ హసన్‌ పెవిలియన్ చేరాడు. వీరిద్దరూ వికెట్ కీపర్‌ ఎడ్వర్డ్స్‌కు క్యాచ్‌ ఇచ్చారు. తర్వాత వచ్చిన నజ్ముల్‌, షకీబ్‌ కూడా క్రీజులో నిలవలేకపోయారు. నిలకడగా బౌండరీలు బాదిన హసన్‌ మిరాజ్‌ను బాస్‌ డీ లీడే ఔట్‌ చేయగా.. ముష్పీకర్ రహీమ్‌ను వాన్ మీకెరెన్ క్లీన్‌బౌల్డ్ చేశాడు. దీంతో 70 పరుగులకే బంగ్లా ఆరు వికెట్లు కోల్పోయింది. ఈ దశలో మహ్మదుల్లా, మెహదీ హసన్ నిలకడగా ఆడటంతో స్కోరు 100 దాటింది. అనంతరం వీరిద్దరూ స్వల్పవ్యవధిలో ఔటయ్యారు. బాస్ డీ లీడే బౌలింగ్‌లో మహ్మదుల్లా.. ఆర్యన్‌దత్‌కు చిక్కగా.. హసన్ రనౌటయ్యాడు. తర్వాత ముస్తాఫిజుర్ (20; 35 బంతుల్లో 2 ఫోర్లు, 1 సిక్స్‌) పోరాడినా ఫలితం లేకపోయింది.

నెదర్లాండ్స్‌ బ్యాటర్లలో స్కాట్‌ ఎడ్వర్డ్స్‌ (68; 89 బంతుల్లో 6 ఫోర్లు), వెస్లీ బరేసి (41; 41 బంతుల్లో 8 ఫోర్లు) రాణించగా.. సిబ్రాండ్ ఎంగెల్‌బ్రెచ్ట్ (35; 61 బంతుల్లో 3 ఫోర్లు) ఫర్వాలేదనిపించాడు. ఓపెనర్లు విక్రమ్‌జిత్ సింగ్ (3), మాక్స్‌ ఔడౌడ్ (0) సింగిల్ డిజిట్ స్కోరుకే పరిమితమయ్యారు. కోలిన్ అకెర్మాన్‌ (15), బాస్‌ డీ లీడే (17) పరుగులు చేశారు. చివర్లో వాన్‌ బీక్‌ (23; 16 బంతుల్లో 2 ఫోర్లు, 1 సిక్స్‌) దూకుడుగా ఆడి ఇన్నింగ్స్‌ ఆఖరి బంతికి ఎల్బీడబ్ల్యూగా వెనుదిరిగాడు. దీంతో నెదర్లాండ్స్‌ ఆలౌటైంది. బంగ్లా బౌలర్లలో తస్కిన్ అహ్మద్ 2, షోరిపుల్ ఇస్లామ్ 2, ముస్తాఫిజుర్ రహ్మన్‌ 2, మెహదీ హసన్ 2, షకీబ్‌ అల్ హసన్‌ ఒక వికెట్ తీశారు.

► Read latest Sports News and Telugu News

► Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.