SL vs AFG: అఫ్గాన్‌ ‘సూపర్‌’ పోరాటం.. చివర్లో పుంజుకుని గెలిచిన శ్రీలంక

లాహోర్‌: ఆసియా కప్‌లో భాగంగా సూపర్‌-4లో చోటుకోసం అఫ్గాన్‌, శ్రీలంక చావోరేవో అన్నట్లు పోరాడాయి. గొప్పగా పోరాడిన అఫ్గాన్‌ గెలుపుతీరాలకు వెళ్లి చివరి మెట్టు వద్ద బోల్తా పడింది. ఇక ఆసియా కప్‌ ఆశలు దూరం అవుతున్న సమయంలో పుంజుకున్న శ్రీలంక సూపర్‌-4 బెర్త్‌ దక్కించుకోవడమే కాకుండా మ్యాచ్‌లోనూ విజయం సాధించింది. తొలుత బ్యాటింగ్‌ చేసిన శ్రీలంక నిర్ణీత 50 ఓవర్లలో ఎనిమిది వికెట్ల నష్టానికి 291 పరుగులు చేసింది. అఫ్గాన్‌ సూపర్-4కు అర్హత సాధించాలంటే 37.1 ఓవర్లలో 292 పరుగులు చేయాల్సి ఉంది. ఈ తరుణంలో అఫ్గాన్‌ 37 ఓవర్లకు 289/8 స్కోరుతో నిలిచింది. ఆ తర్వాతి బంతికి మూడు పరుగులు చేయాల్సిన దశలో వికెట్ కోల్పోవడంతో అఫ్గాన్‌ సూపర్‌-4 ఆశలు ఆవిరయ్యాయి. తర్వాత 37.4 ఓవర్ల వద్ద చివరి వికెట్‌ను కోల్పోయి ఆలౌట్‌ అయింది. దీంతో శ్రీలంక రెండు పరుగుల తేడాతో గెలిచి సూపర్‌-4కు దూసుకెళ్లింది.  

బౌండరీల వర్షం కురిపించిన నబీ..

లక్ష్యఛేదనలో అఫ్గాన్‌ 50 పరుగులకే మూడు వికెట్లు కోల్పోయి కష్టాల్లో పడింది. ఈ దశలో రహమత్‌ షా (45; 40 బంతుల్లో), హస్మతుల్లా షాహిది (59; 66 బంతుల్లో) నిలకడగా ఆడి ఇన్నింగ్స్‌ను గాడిలో పెట్టారు. తర్వాత మహమ్మద్‌ నబీ (65; 32 బంతుల్లో 6 ఫోర్లు, 5 సిక్స్‌లు) బౌండరీల వర్షం కురిపించడంతో అఫ్గాన్‌ వడివడిగా విజయం దిశగా సాగింది. నబీ ఔటైన తర్వాత కరీమ్ జనత్ (22,; 13 బంతుల్లో 1 ఫోర్, 2 సిక్స్‌లు), నజిబుల్లా జర్దాన్‌ (23; 15 బంతుల్లో 1 ఫోర్, 2 సిక్స్‌లు) కూడా దూకుడుగా ఆడటంతో అఫ్గాన్‌ విజయానికి చేరువైంది. అయితే ఓవైపు వికెట్లు పడుతున్నా అఫ్గాన్‌ ఆటగాళ్లు ధాటిగా ఆడుతుండడంతో శ్రీలంక శిబిరంలో ఆందోళన చెలరేగింది. చివర్లో రషీద్‌ ఖాన్‌ (27*; 16 బంతుల్లో  4 ఫోర్లు, 1 సిక్స్‌) పోరాడినా జట్టును గెలిపించలేకపోయాడు. 

తొలుత టాస్‌ గెలిచి బ్యాటింగ్ చేసిన శ్రీలంకకు ఓపెనర్లు పాథూమ్‌ నిశాంక (41; 40 బంతుల్లో 6 ఫోర్లు), డిముత్‌ కరుణరత్నె (32; 35 బంతుల్లో 6 ఫోర్లు) శుభారంభం అందించారు. అనంతరం ధాటిగా ఆడిన కుశాల్ మెండిస్ (92; 84 బంతుల్లో 6 ఫోర్లు, 3 సిక్స్‌లు) సెంచరీ మిస్‌ చేసుకున్నాడు. ఆల్‌రౌండర్‌ చరిత్ అసలంక (36) ఫర్వాలేదనిపించాడు. 227 పరుగులకు ఏడు వికెట్లు కోల్పోయిన శ్రీలంక.. టెయిండర్లు వెల్లలాగే (33), మహీశ్ తీక్షణ (28) గొప్పగా పోరాడటంతో భారీ స్కోరు సాధించింది.