Viral: చీరల కోసం కుమారుడి ప్రాణాలను పణంగా పెట్టిన తల్లి.. వైరల్‌ వీడియో

దిల్లీ: ప్రమాదంలో ఉన్న బాలుడిని చీర సాయంతో పైకి లాగి కాపాడుతున్నట్లుంది కదా.. పై ఫొటోలోని దృశ్యం. కానీ మ్యాటర్‌ అది కాదు. ఓ తల్లి అజాగ్రత్త, బాధ్యతారాహిత్యానికి అద్దంపట్టే దృశ్యాలు ఇవి. ఆరేసిన చీరలు కింది ఫ్లోర్‌లో పడిపోతే.. వాటిని తీసుకొచ్చేందుకు కుమారుడితో ఓ తల్లి చేయించిన సాహసం ఇది. ఇందుకు సంబంధించిన ఓ వీడియో వైరల్‌ కావడంతో ఆ తల్లిపై విమర్శలు వెల్లువెత్తుతున్నాయి.

దిల్లీ సమీపంలోని ఫరీదాబాద్‌లో ఓ మహిళ తన కుటుంబంతో నివాసముంటోంది. ఫ్లోరిడా అపార్ట్‌మెంట్ కాంప్లెక్స్‌లోని 10వ అంతస్తులో వారు ఉంటున్నారు. అయితే బాల్కనీలో వేసిన దుస్తులు కింది 9వ అంతస్తులో పడిపోవడంతో.. ఓ చీర సాయంతో తన కుమారుడిని 9వ అంతస్తులోకి దించింది ఆ తల్లి. బాలుడు చీరల్ని పట్టుకోగా మళ్లీ అదే రీతిలో కుమారుడిని పైకి లాగింది. ఓ వృద్ధురాలు కూడా ఆమెకు సాయమందించింది. ఒకవేళ చేయి జారిపోయి కిందపడిపోతే ఆ బాలుడి ప్రాణాలు గాల్లో కలిసిపోయేవే. ఎదురు బిల్డింగ్‌లోని ఓ వ్యక్తి ఈ దృశ్యాలను చిత్రీకరించి ఆ వీడియోను సామాజిక మాధ్యమాల్లో ఉంచగా.. అది కాస్తా వైరల్‌గా మారింది.

ఈ వీడియోను చూసిన నెటిజన్లు భయాందోళన వ్యక్తం చేశారు. కనీసం ఎలాంటి జాగ్రత్తలు కూడా పాటించకుండా వారు ఈ తరహా సాహసానికి తెగించడంపై మండిపడ్డారు. ఐపీఎస్‌ అధికారి దిపాన్షు కబ్రా సదరు వీడియోను ట్విటర్‌లో షేర్‌ చేస్తూ.. ఆ తల్లి చర్యను ఖండించారు. ‘అజాగ్రత్త, బాధ్యతారాహిత్యానికి పరాకాష్ట’ అంటూ వ్యాఖ్యానించారు.

ఈ ఘటనపై ఆ కాంప్లెక్స్‌లోని పర్వీణ్‌ సరస్వత్‌ మాట్లాడారు. 9వ ఫ్లోర్‌లోని ఓ ఫ్లాట్‌కు నిత్యం తాళం వేసి ఉండటం, అక్కడికి వెళ్లేందుకు వీలులేకపోవడంతో ఆ తల్లి ఇలా చేశారని తెలిపారు. కాగా ఈ ఘటనపై వివరణ ఇవ్వాలని అపార్ట్‌మెంట్ కాంప్లెక్స్ యాజమాన్యం ఆ మహిళకు నోటీసు జారీ చేసినట్లు పేర్కొన్నారు. అయితే కుమారుడి ప్రాణాలను పణంగా పెట్టిన తన చర్య పట్ల బాలుడి తల్లి విచారం వ్యక్తం చేసినట్లు సమాచారం.