Guinness World Record: గుండెకు మూడు సర్జరీలు.. అయినా గిన్నిస్‌ రికార్డు..!

ఇంటర్నెట్‌ డెస్క్‌: హృదయానికి మూడు సార్లు బైపాస్‌ సర్జరీలు చేయించుకొని అత్యధిక కాలం జీవించిన వ్యక్తిగా గిన్నిస్‌ రికార్డు (Guinness World Record)లో స్థానం సంపాధించారు బ్రిటన్‌కు చెందిన 77 ఏళ్ల కోలిన్‌ హాంకాక్‌ (Colin Hancock). ఈ క్రమంలో పాత రికార్డును ఆయన బద్దలు కొట్టారు.

వంశపారపర్యంగా సంక్రమించే హైపర్‌ కొలెస్టెరోలేమియా అనే సమస్యతో కోలిన్‌ బాధపడుతున్నారు. ఇది శరీరంలో కొవ్వులు పెరగడంతో పాటు కరోనరీ హార్ట్‌ డిసీజ్‌కు కారణమవుతుంది. దీని వల్ల 30 ఏళ్ల వయసులో అతడికి గుండె పోటు వచ్చింది. ఆ తర్వాత ఏడాదిలో మూడు సార్లు బైపాస్‌ శస్ర్త చికిత్సలు చేశారు. అతడు ఈ సర్జరీలు చేయించుకుని 45 సంవత్సరాల 361 రోజులు గడించింది. ఈ కాలంలో ఆయనకు మరో శస్ర్త చికిత్స జరగలేదు. ఇప్పటికీ కోలిన్‌ ఆరోగ్యంగా ఉన్నారు. దీంతో గిన్నిస్‌ వరల్డ్‌ రికార్డులో స్థానం పొందారు. గతంలో ఈ రికార్డు అమెరికాకు చెందిన డెల్బర్ట్ డేల్ మెక్‌బీ పేరిట ఉంది. ఆయన ట్రిపుల్‌ బైపాస్‌ సర్జరీ చేయించుకుని 41 ఏళ్ల 63 రోజులు జీవించారు. 2015లో తన 90 ఏటా ప్రాణాలు కోల్పోయారు. ప్రస్తుతం కోలిన్‌ ఈ రికార్డును బద్దలు కొట్టారు.

రెండేళ్లలో మూడు గిన్నిస్‌ రికార్డులు

30 ఏళ్ల వయసులో తాను పలు క్రీడల్లో పాల్గొనేవాడినని.. ఆ సమయంలో తనకి గుండె సంబంధిత వ్యాధి ఉన్నట్లు ఎలాంటి లక్షణాలు కనిపించలేదని కోలిన్‌ తెలిపారు. అయితే, తన చిన్నతనంలో ఆరోగ్యం కోసం మంచి ఆహారం కూడా తీసుకోలేదని వెల్లడించారు. గుడ్లు, చిప్స్‌ ఇష్టంగా తినేవాడిని తెలిపారు.