Golden Visa: ఆస్ట్రేలియా ‘గోల్డెన్‌ వీసాలు’ ఇక బంద్‌.. భారతీయులపై ప్రభావమెంత..?

ఇంటర్నెట్ డెస్క్‌: ఆస్ట్రేలియా (Australia) ప్రభుత్వం కీలక నిర్ణయం తీసుకుంది. పెట్టుబడులకు కీలకమైన ‘గోల్డెన్‌ వీసా (Golden Visa)’ల జారీని రద్దు చేస్తున్నట్లు ప్రకటించింది. ఈ వీసా ప్రోగ్రామ్‌ ఆశించిన ఆర్థిక ఫలితాలను ఇవ్వట్లేదని ఆ దేశ హోం మంత్రిత్వ శాఖ వెల్లడించింది. దీని స్థానంలో వృత్తి నిపుణులకు ఇచ్చే వీసాలను పెంచనున్నట్లు తెలిపింది.

ఏంటీ గోల్డెన్‌ వీసా..?

విదేశాలకు చెందిన సంపన్న పెట్టుబడిదారులు కొన్నేళ్ల పాటు తమ దేశంలో నివసించేందుకు వీలుగా ఈ గోల్డెన్‌ వీసాలను జారీ చేస్తుంటారు. ఆస్ట్రేలియా నిబంధనల ప్రకారం.. కనీసం 5 మిలియన్‌ డాలర్ల పెట్టుబడి పెట్టేవారు ఈ వీసాతో ఐదేళ్ల పాటు అక్కడ ఉండొచ్చు. విదేశీ పెట్టుబడిదారులను ఆకర్షించేందుకు 2012లో ఈ ప్రోగ్రామ్‌ను ప్రారంభించారు.

విదేశీ విద్యార్థుల స్టడీ పర్మిట్లపై కెనడా పరిమితి

హోంశాఖ గణాంకాల ప్రకారం.. ఇప్పటివరకు దాదాపు లక్ష మంది ఈ ప్రోగ్రామ్‌ కింద ఆస్ట్రేలియాలో రెసిడెన్సీ దక్కించుకున్నారు. ఇందులో 85శాతం చైనా మిలియనీర్లే కావడం గమనార్హం. అయితే, గత కొన్నేళ్లుగా ఈ స్కీమ్‌పై విమర్శలు వ్యక్తమవుతున్నాయి. ఈ వీసా ప్రోగ్రామ్‌ను దుర్వినియోగం చేసి కొందరు విదేశీయులు అక్రమ సంపదను తరలిస్తున్నారనే వాదనలున్నాయి. దీంతో వీటి జారీని రద్దు చేస్తున్నట్లు హోంమంత్రి క్లేర్‌ ఓ నీల్‌ తమ ప్రకటనలో వెల్లడించారు. వీటి స్థానంలో వృత్తి నిపుణులకు మరిన్ని ఎక్కువ వీసాలు జారీ చేయడంపై తమ ప్రభుత్వం దృష్టి సారించనుందని తెలిపారు. ఇప్పటికే కెనడా, బ్రిటన్‌, సింగపూర్‌ వంటి దేశాలు కూడా ఈ తరహా వీసా స్కీమ్‌లను రద్దు చేశాయి.

భారత్‌పై తక్కువ ప్రభావమే..

ఆస్ట్రేలియా నిర్ణయం భారతీయులపై తక్కువ ప్రభావమే చూపించనుందని నిపుణులు చెబుతున్నారు. 2022 వరకు ఉన్న గణాంకాలను పరిశీలిస్తే.. ఈ దేశంలో అమెరికా, యూకే దేశస్థులు ప్రధాన పెట్టుబడిదారులుగా ఉన్నారు. ఆ తర్వాత బెల్జియం, జపాన్‌, సింగపూర్‌ వంటి దేశాలున్నాయి. మొత్తం విదేశీ పెట్టుబడుల్లో భారత్‌ 17వ స్థానంలో ఉంది. ఇక, వృత్తి నిపుణులను పెంచుకోవాలని ఆస్ట్రేలియా భావిస్తోంది. విదేశీ విద్యార్థుల కోసమూ ప్రత్యేక వీసా ప్రోగ్రామ్‌లు తీసుకురావాలని భావిస్తోంది. ఈ పరిణామాలు నైపుణ్యం గల భారత యువతకు ప్రయోజనకరమేనని నిపుణులు అభిప్రాయపడుతున్నారు.